Media britanike, publiku vendas dhe politikanët në ishull në javën e fundit kanë vendosur shqiptarët në krye të komenteve dhe deklaratave të tyre që lidhen me problemin e krijuar me emigrantët e paligjshëm që kalojnë “La Manshin” me gomone.
Shqiptarët po shigjetohen masivisht si burimi i këtij problemi dhe ministrja e Brendshme, Suella Braverman ka atakuar drejtpërdrejtë ata duke i cilësuar si kriminelë që po “pushtojnë” Britaninë dhe abuzojnë me Aktin e Skllavërisë moderne, ndaj duhen deportuar së më parë.
Gjuha e saj e urrejtjes është dënuar nga kryeministri Edi Rama, i cili nënvizon se nuk mund të zgjidhet me retorikën e krimit problemi i krijuar në Dover e Kent, duke hequr përgjegjësinë për azilkërkuesit shqiptar nga vetja dhe duke ja lënë fajin legjislacionit të dështuar britanik.
Ndërkohë, ata që po mbeten si “plaçkë pa zot” në vigjiljen e kësaj përplasje mes Ramës dhe Britanisë janë emigrantët shqiptarë, çdo veprim i të cilëve cilësohet si provokim tanimë nga britanikët.
DailyMail së fundmi, teksa publikon një kolazh fotosh nga kampi i tejmbushur i Manston, ndalet te imazhet e dy shqiptarëve, të cilët sipas medias britanike po provokojnë duke bërë simbolin e shqiponjës dykrenare me duar.
Fotot janë kapur në momentin që azilkërkuesit po largoheshin nga qendra e mbërritjes në Manston, ndërsa djemtë shihen të buzëqeshur teksa bashkojnë duart për të formuar shqiponjën dykrenore nga dritarja e autobusit.
Duke e konsideruar “gjest nacionalist”, DailyMail rikthen në kujtesë shqiponjën e realizuar nga Granit Xhaka dhe Xherdan Shaqiri pas golave të tyre ndaj Serbisë në Kupën e Botës 2018.
“Fotot vijnë pasi Sekretarja e Brendshme, znj. Braverman, ka veçuar shpesh azilkërkuesit shqiptarë pasi numri i atyre që kalojnë Kanalin me gomone u rrit ndjeshëm”, shkruan më tej media britanike.
