Për të evituar komplikimin e situatës me tifozët e saj problematikë, Anglia do të dërgojë një grup policësh në Katar të cilët do të drejtojnë dhe këshillojnë fansat për zonat ku duhet të konsumojnë alkool dhe sjelljen e tyre në qytetin e Dohas.
Sipas “Daily Mail”, mijëra tifozët që do të zbarkojnë në vendin e Lindjes së Mesme rrezikojnë shumë me “ligjin e moralit” dhe si pasojë mund të rrezikojnë edhe burgun, prandaj përveç policëve të punësuar nga Pakistani e Turqia, Katari do të ketë edhe ndihmën e britanikëve.
Do të jenë rreth 15 policë anglezë që shumë shpejt do të zbarkojnë në Doha, ndërsa ata janë instruktuar që t’i këshillojnë tifozët anglezë të evitojnë përballjen fizike me forcat vendase të sigurisë.
Rreth 7 mijë anglezë dhe uellsianë parashikohet të zbarkojnë në Katar ndërsa rreth 20 mijë të tjerë jetojnë në Doha. Konsumi i pijeve alkoolike në ambjentet e palejuara do të dënohet deri në 6 muaj heqje lirie, ndërsa sjelljet e turpshme deri në 6 vite pas hekurave.
Ndërkohë, sipas një rekomandimi të publikuar ditët e fundit nga policia britanike, tifozët bëjnë mirë të evitojnë edhe shëtitjet dorë për dore në ambjentet publike.
