Juventus do të kthehet në fushë të mërkurën në mbrëmje për ndeshjen e fundit të grupit në Champions League. Bardhezinjtë do të presin në shtëpi Paris Saint-Germain.
Bardhezinjtë nuk kanë arritur të kualifikohen për në 1/8-at, por janë akoma në lojë për të siguruar një vend në 1/16-at e Europa League dhe për ta bërë këtë do të duhet të marrin një fitore ndaj Messi-t me shokë.
Siç dihet, Juventus ka shumë probleme me dëmtimet në këtë sezon dhe trajneri Massimiliano Allegri ka qenë protagonist i një skene argëtuese kur në konferencë për shtyp ka marrë pyetjen e radhës për gjendjen e Federico Chiesa-s.
Trajneri i bardhezinjve është mësuar tashmë dhe kur ka ardhur pyetja nga një gazetare në lidhje me këtë temë, ai ka nxjerrë nga xhepi një letër duke i dhënë jetë një skene argëtuese.
“Ta bëjmë kështu: meqë në shkollë kam shkuar pak, atëherë kam shkruar gjithçka. Chiesa për momentin nuk është në kushtet ideale për të luajtur një ndeshje”, ka thënë Allegri.
“Ndihet më mirë dhe ka zhvilluar një ndeshje nga momenti që jemi kthyer nga Lisbona, por më pas i janë dashur 4 ditë për të rikuperuar. Kjo do të thotë se nuk është akoma në gjendje për të luajtur. Unë shpresoj ta kem sa më shpejt të jetë e mundur ashtu si edhe Pogba-në, por sot nuk është kështu”, ka thënë Allegri.
