“Primaret” kanë nisur ethshëm për Partinë Demokratike, me Tiranën që u bë e para që njohi brenda pak ditëve dy kandidatë për garën, e cila do të nxjerrë edhe rivalin që do të sfidojë me shumë gjasë Erion Veliaj në zgjedhjet lokale të 14 Majit.
Me Belind Këlliçin që ka nisur zyrtarisht fushatën nga zona e “Unazës së Re” ku është edhe deputet e ish-deputetin Gert Bogdani që njoftoi sot kandidaturën, pritet që emra të rinj t’i bashkohen procesit dhe ta bëjnë sa më sfidues dhe gjithëpërfshirës.
Ndërkohë edhe Fieri është një nga bashkitë e mëdha ku PD synon të rrëzojë hegjemoninë e krijuar nga Armando Subashi që prej kohës kur la postin e deputetit për të pranuar ofertën e Ramës për të marr në duar timonin e qytetit.
I pari emër që ka shprehur vullnetin për të kërkuar besimin e demokratëve në “Primare” e më pas të fierakëve në zgjedhje është anëtari i PD-së në Fier, Artur Mahmutaj.
Lajmin e ka bërë të ditur vetë Mahmutaj, përmes një statusi në rrjetet sociale 7 ditë përpara mbylljes së afatit për regjistrimin e kandidatëve për “Primaret”, që mbyllet më 6 nëntor, në orën 20:00.
Mahmutaj shprehet se gjendja në qytetin e Fierit kërkon veprime të shpejta e të guximshme.
Postimi i Mahmutajt:
Të nderuar anëtar dhe simpatizantë të Partisë Demokratike Fier. Gjendja në qytetin e Fierit kërkon veprim, të guximshëm dhe të shpejtë – dhe ne duhet të veprojmë! Për këtë arsye, si anëtar i PD-së prej 30 vitesh, marr përgjegjësinë të kandidojë për zgjedhjet primare për Kryetar të Bashkisë Fier.
Partia Demokratike është shpresa më e mirë për të ridrejtuar qytetin tonë me një vizion më njerëzor, të drejtë dhe paqësor. Qëndroj i përulur për detyrën që kemi përpara, mirënjohës për besimin e dhuruar, i ndërgjegjshëm për sakrificat që na presin.
Kemi zgjedhur shpresën mbi frikën, unitetin e qëllimin mbi konfliktin dhe mosmarrëveshjen. Së bashku do ia dalim!
