Paul Pelosi, bashkëshorti i kryetares së Dhomës së Përfaqësuesve të SHBA, Nancy Pelosi, është duke marrë veten pas ndërhyrjes kirurgjikale që kreu sepse u sulmua në shtëpinë e tij nga një person i cili e qëlloi me çekiç.
Pelosi, 82 vjeç, pësoi dëmtime në kafkë dhe lëndime serioze në krahun e djathtë dhe duar, raporton BBC.
I dyshuari thuhet se ka kërkuar të takojë zonjën Pelosi pasi hyri në shtëpinë e çiftit në San Franciskos.
Presidenti Joe Biden e cilësoi sulmin si politik dhe e quajti atë “të neveritshëm”.
Një 42-vjeçar është arrestuar me akuzën e vrasjes së mbetur në tentativë. Nuk dihet ende asnjë motiv mbi sulmin.
Zonja Pelosi – e cila ishte në anën tjetër të vendit në Uashington DC në kohën e sulmit – u kthye për të parë burrin e saj në spital.
Një zëdhënës i saj tha se Pelosi ishte sulmuar në orët e para të mëngjesit të së premtes “nga një person që veproi me forcë dhe kërcënoi jetën e tij ndërsa kërkonte të shihte zonjën Pelosi”.
Paul Pelosi u qëllua rëndë, duke pësuar një traumë të fortë pasi u godit disa herë në kokë. Ai u shtrua në Spitalin e Përgjithshëm Zuckerberg në San Francisco për lëndimet e tij, konfirmoi spitali.
