Bashkimi Evropian tha se është i “zhgënjyer” me vendimin e qeverisë së Kosovës për mosshtyrjen e afatit për riregjistrimin e makinave që kanë targa të lëshuara nga Serbia dhe konvertimin e tyre në targat RKS – Republika e Kosovës.
“Është zhgënjyese të shohësh se nuk është ndjekur këshilla e partnerëve ndërkombëtarë. “Marrëveshja përkatëse e vitit 2016 parashikonte një proces të përcaktuar qartë me një afat kohor 12-mujor për procesin e largimit të targave, i cili nuk është ndjekur. Kosova duhet të lejojë një periudhë më të gjatë tranzicioni”, thuhet në reagimin e BE-së.BE tha se është e domosdoshme ruajtja e qetësisë dhe u bëri thirrje palëve që të shmangin çdo veprim apo retorikë që mund të rrezikojë stabilitetin në terren, veçanërisht në veri të Kosovës”.Një ditë më parë edhe Shtetet e Bashkuara të Amerikës thanë se janë të “zhgënjyera dhe të shqetësuara që Qeveria e Kosovës ka refuzuar kërkesat e partnerëve ndërkombëtarë për ta bërë një gjë të tillë”.
