Vizita e tij në Beograd nuk shkoi ashtu siç pritej dhe zv/kryeministri i Kosovës, Besnik Bislimi u kthye në gjysmë të rrugës, pasi autoritetet serbe nuk i garantuan dot sigurinë, teksa ishte parashikuar pjesëmarrja në dy konferenca.
Ishte Dushan Janjiç, organizator i konferencës ku Bislimi do të fliste për “Kosovën dhe Perspektivën Evropiane të Rajonit”, i cili njoftoi pak orë më parë se zëvendësi i Albin Kurtit po kthehej mbrapsht përmes pikës së kalimit kufitar të Merdares sepse autoritetet serbe nuk i kishin garantuar sigurinë.
Në një komunikatë për mediat pas mbërritjes në Kosovë, Bislimi ka sqaruar ngjarjet e orëve të fundit, duke shpjeguar se atij nuk i është lejuar që të vijojë rrugën drejt Beogradit, edhe pse kërkesa për vizitë ishte bërë para një jave dhe ishte aprovuar.
Më tej numri dy i qeverisë kosovare sqaroi se në mes të rrugës i kishte dalë një makinë policie serbe e cila i kishte informuar se për arsye sigurie vizita e tij në Beograd nuk mund të lejohej.
“Ne kemi bërë kërkesën për vizitë para një jave. Vizita është aprovuar. Kemi kaluar kufirin. Jemi afruar deri në Beograd. Aty na ka dalë një veturë tjetër e policisë që na ka ndalë e ka thënë se për arsye të sigurisë s’mund të bëhet. Po del se është krejt manipulim… Doli një veturë shtesë, ka dalë konvoji dhe ka kërkuar të kthehemi se gjoja ka probleme për siguri. Ka thënë se po kërcënohet siguria”, u shpreh Bislimi.
