Kryeministri Edi Rama duket të jetë i pakënaqur nga paketa e ndihmës që Bashkimi Europian po përgatit për t’i dhënë “një dorë” Ballkanit Perëndimor në përballimin e krizës energjetike, të krijuar edhe si pasojë e luftës Rusi-Ukrainë.
“Nuk na mjaftojnë fare ato 80 milionë euro, por janë një ndihmë e rëndësishme”, ishte përgjigja që shefi i qeverisë i dha gazetarëve kur u pyet nëse fondi i shkëputur nga paketa 500 milionë euro për BP do të ndihmonte qeverinë për të mos aplikuar fashën 800 kWh.
Kryeministri shtoi më tej se gjatë vitit të fundit Shqipëria ka shpenzuar thuajse 500 milionë euro vetëm për të importuar energji nga jashtë, me qëllim përballimin e krizës.
“80 milionë euro grante nuk janë pak, janë një shifër e konsiderueshme. Për t’u përgjigjur pyetjes, sa pjesë e të tërë nevojës janë që të mbrojmë çmimin e familjeve, janë një e gjashta. Nëse i referohemi këtij viti, na është dashur në total, 460 milionë euro. Një shumë e kombinuar nga buxheti i shtetit dhe OSHEE. Një shumë që ka ndihmuar edhe për inflacionin”, tha Rama.
Sipas shefit të qeverisë, nëse do të ishte vendosur që të prekej “qoftë dhe pak çmimin e energjisë, do të kishte reflektuar menjëherë te të gjitha çmimet e familjeve”.
“E dyta, nuk do ta rrisim çmimin e energjisë. Vendosja e fashës nuk është rritje, por vendosja e një tavani, nën të cilin çdo familje mund të kryejë nevojat bazike, pa pasur nevojë për më shumë”, shtoi Rama.
