Një 23-vjeçar shqiptar dhe partnerja e tij greke në të njëjtën moshë janë arrestuar pasi akuzohen për prodhimin dhe shumëfishimin e sasive të lëndëve narkotike me qëllim shpërndarjen dhe shitjen e tyre brenda territorit grek.
Mediat greke raportojnë se të arrestuarit ishin anëtarë të një grupi kriminal, që furnizonin sasi të mëdha heroine, të cilën më pas e shumëfishonin në vendin ku kishin ngritur si një “laborator” të improvizuar.
Nga hetimet e kryera në “laborator” janë gjetur dhe konfiskuar:
Një cilindër propan i lidhur me një sy gazi,
Enë me 5 pako heroinë me peshë totale 2524 gram,
Një peshore precize,
Enë të ndryshme që përdoreshin për përzierjen e substancave,
70 thasë për paketimin e ushqimeve dhe
2 celularë të cilët i përdornin për transaksionet e tyre të paligjshme.
Autoritetet greke bëjnë me dije se 23-vjeçari ka tentuar të largohet nga vendi i ngjarjes në këmbë dhe ka bërë rezistencë të fortë ndaj arrestimit, ndërsa dispononte një kartë identifikimi policor me foton e tij dhe të dhënat e një personi tjetër, të cilin e përdori për të shmangur arrestimin, ndërsa ndaj tij kishte 2 urdhër arreste për përfshirjen në banda kriminale dhe shkelje të ligjit për lëndët narkotike.
