Sulmet me epitete mbi familjarët dhe gjuha e ashpër me të cilën politikanët etiketojnë njëri-tjetrin ka qenë gjithmonë prezente në skenën politike shqiptare.
Shpeshherë etika tejkalohet dhe debati eskalon në fyerje, duke e shndërruar Parlamentin në një arenë përplasjesh personale përtej halleve dhe problemeve të qytetarëve.
Belinda Balluku është një nga politikanet, e cila atakohet më tepër për të shkuarën e familjes së saj, pasi është mbesa e Beqir Ballukut, ish-ministrit të shtetit diktatorial të Enver Hoxhës.
Gjatë një interviste televizive, ministrja e Infrastrukturës dhe Energjisë, e pyetur në lidhje me familjarët dhe përmendjen e tyre nga kundërshtarët politikë, është përgjigjur se kjo është një nga sportet më të ndyra në parlament.
Ajo shprehet se çdo vepër e gjyshit të saj që përmendet nga rivalët politikë do të gjykohet nga historia, ndërsa u mbrojt duke shtuar se familja Balluku mban mbi super 135 vite burg dhe internim prej sistemit diktatorial.
“Një fakt që nuk mohon dot askush për familjen time, për familjen Balluku dhe nuk flas këtu për farefisin, po flas këtu për gjyshin tim, gjyshen, mamanë, babain, xhaxhallarët dhe dy hallat e mia, pra për familjen e ngushtë, familja ime ka në kurriz 135 vjet burg dhe internim dhe nuk e di kush nga deputetët e parlamentit ka gojë të zërë emrin e familjes time”, tha Balluku.
Komentet e saj ministrja Balluku i bëri teksa sqaroi se për të ligji i hapjes së dosjeve që u votua në Kuvend është shumë i rëndësishëm.
