Kreu i PBDNJ-së, Vangjel Dule ka konfirmuar sot se forca e tij politike do të vijojë t’i qëndrojë përballë mazhorancës dhe do të kandidojë si pjesë e opozitës në zgjedhjet lokale të 14 majit 2023.
Teksa në frontin opozitar kanë nisur përgatitjet për përzgjedhjen e kandidatëve përmes Primareve të organizuar nga Partia Demokratike, ku edhe Ilir Meta kërkoi përfshirjen e emrave nga PL, Dule ka shprehur hapur aspiratën për 3 bashki, ku duket se do të kandidojë i vetëm përballë Ramës pasi beson se PBDNJ del forcë e parë.
Në “Zona Zero”, kreu i PBDNJ tha se 3 bashkitë ku ai synon të dalë me kandidatët e vetë për zgjedhjet vendore 2023 janë Dropulli, Finiqi dhe Himara.
“Opozita duhet të kapërcejë vetveten, jemi në mision të vështirë, por jo të pamundur, së pari duhet të kemi parasysh se kemi përballë një pushtet autokratik, një demokraci që ka ardhur duke u tkurrur. Kemi zgjedhje që janë përkeqësuar nga pikëpamja e standardit evropian. Fronti opozitar duhet të kompaktësohet një orë e më parë, të akumulojë të gjitha energjitë që i duhen për të përballuar këtë betejë. Është gjë jo e mirë kur ke një qeveri që qeveris keq, por është akoma më keq kur ke një opozitë që nuk jep shpresë. PDNJ do jetë përballë Ramës, do të kemi kandidaturat tona në tre bashki. Ka bashki ku jemi parti e parë ose e dytë”, tha ndër të tjera Dule.
