Një i ri shqiptar ka përfunduar në prangat e policisë britanike në Bradford pasi është gjetur brenda një “shtëpie bari” me vlerë 90 mijë paund.
Sipas mediave angleze, Mikel Veliu është dënuar me 12 muaj burg. Në momentin e arrestimit ai kishte një portofol plot me para, ushqime dhe çelësat e banesës së konvertuar në fermë kanabisi në Broadstone Way.
25-vjeçari jetonte në një ambient të përshtatur në kuzhinë dhe kujdesej për bimët e kanabisit, që prej kohës kur ishte transportuar aty nga drejtuesit e rrjetit kriminal të drogës.
Prokurori Philip Adams tha sot në Gjykatën e Lartë të Bradford se Veliu kishte pranuar fajin për prodhimin e kanabisit në seancën e 25 shtatorit.
Policia hyri në pronë në orën 07:30 dhe gjeti katër dhoma me bimë kanabis. Adams tha se 168 bimët do të kishin prodhuar rreth 9 kg kanabis me një vlerë në rrugë më të madhe se 90,000 £.
Ai tha se ishte një operacion i aftë për të prodhuar sasi të konsiderueshme të drogës së klasit B për përdorim komercial.
Ndërkohë, Veliu i tha policisë se kishte 6000 £ borxh ndaj trafikantëve që e sollën në Britani. Ai pretendon se ndodhej në këtë banesë prej vetëm 2 javësh dhe se ajo u përshtat në “shtëpi bari” kur ai hyri brenda.
Veliu ka hyrë ilegalisht në Britani dhe atij fillimisht iu afruan trafikantët në një kamp refugjatësh. Ai u mor prej tyre dhe u dërgua në Leicester, e më pas në shtëpinë në Bradford. 25-vjeçari pretendon se është kërcënuar ai dhe familja e tij, aq sa këta të fundit u larguan nga Shqipëria për të shpëtuar nga çdo dëm i mundshëm.
Gjyqtari Jonathan Rose pranoi se “kishte një masë kërcënimi” ndaj Veliut, por në anën tjetër ai kishte ushqim, para dhe aftësi për të denoncuar trafikantët por ai nuk bëri asnjë përpjekje për t’i treguar policisë për gjendjen e tij të vështirë.
