Komuniteti i Nea Skionit në Kalkidhiki u trondit nga tragjedia e ndodhur të enjten mbrëma ku një burrë 53-vjeçar humbi jetën pasi u godit me sëpatë.
Autorë të ngjarjes së rëndë janë dy vëllezër shqiptarë 27 dhe 47 vjeç, të cilët u arrestuan mesditën e së premtes nga policia pasi akuzohen për “vrasje”, “tentativë vrasje” dhe “përdorim të armëve”.
Mediat greke kanë zbardhur më tepër detaje nga ngjarja, duke iu referuar prononcimeve të dëshmitarëve okularë, të cilët kanë zbuluar se gjithçka ka ndodhur rreth orës 23:00 të së enjtes, kur dy vëllezërit shqiptarë kanë mbërritur në shtëpinë ku viktima jetonte me familjen e tij.
Më pas për një arsye ende të panjohur ka shpërthyer një episod i egër dhune me viktimën 53-vjeçar dhe dy fëmijët e tij, ndërsa gjithçka dyshohet se ka ndodhur në rrugicën e vogël jashtë shtëpisë së familjes.
27-vjeçari , i cili raportohet të ketë pasur një lidhje romantike me vajzën e viktimës, ka plagosur me edhe djalin 24-vjeçar të tij, si dhe ka shtyrë në të njëjtën kohë partneren e tij 18-vjeçare.
Më pas, vëllai 47-vjeçar i tij është bërë pjesë e sherrit duke e goditur viktimën me shpinën e sëpatës në gjoks. 53-vjeçari nuk ka ndërruar jetë në vend, por jashtë një karburanti të vjetër, që ndodhet 300 metra larg vendit ku ndodhi sherri.
“Burri po përballej me probleme të rënda shëndetësore. Pas këtij episodi, familjarët e tij e futën në makinë dhe u larguan nga shtëpia, por ai nuk ndihej mirë dhe u ankua se i dhimbte zemra. Ata ndaluan makinën jashtë pikës së vjetër të karburantit, e nxorën të shtrihej dhe në momentin që mbërriti ambulanca ai kishte vdekur”, ka thënë për Protothema.gr një banor i zonës.
Pjesa më e madhe e banorëve bëjnë me dije se dy familjet kanë qenë përleshur shpesh me njëra-tjetrën, ndërsa kanë frikë të flasin pasi e dinë se kishin angazhuar sërish policinë në të kaluarën për çështje dhe akuza të ndryshme.
Siç thonë ata, viktima ishte babai i të riut 24-vjeçar, i cili akuzohet se ka dhunuar një të mitur më 16 shtator, në plazhin e Nea Skionit në Bashkinë e Kasandrës. 24-vjeçari u arrestua, ndërsa pas rrëfimit të tij në hetuesi u la i lirë me kushte shtrënguese.
Vajza e viktimës, sipas banorëve të zonës, ishte në lidhje me 27-vjeçarin që i goditi babain prej më shumë se dy vitesh, por nuk dihet nëse ky fakt lidhet ngjarjen e së enjtes.
“Kur ka ndodhur rrëmuja, viktima ka qenë me të brendshme. Fëmijët e tij dhe gruaja e tij e futën në makinë, por ndaluan pasi nuk ndihej mirë për të marrë pak ajër. Teksa ka shkuar për të dalë nga makina është rrëzuar”, tha një tjetër banor që po kalonte në atë moment.
Ndërkohë bashkëshortja e viktimës tha: “Ne menduam se ishte nga zemra por ai e pati nga goditja me sëpatë”.
Në gjendje të rëndë psikologjike ajo shtoi: “U bë një zhurmë dhe ne thirrëm policinë. Burri im ndjeu një dhimbje dhe dha shpirt në dalje të fshatit. Ne menduam se ishte nga zemra e tij, por ai e pati nga sherri. Nuk dua të them asgjë tjetër, çështjen e ka marrë policia”.
Siç ka raportuar një i afërm i viktimës, ata ende nuk e dinë saktësisht se si ka ndodhur ngjarja tragjike.
“E dimë që të enjten mbrëma ka pasur një sherr shumë të madh për çështje personale. Ndoshta mes 27-vjeçarit dhe vjehrrit të tij. Vdekja erdhi si pasojë e arrestit kardiak, pas goditjeve që mori. Të gjithë jemi të shokuar dhe po përpiqemi të mbështesim gruan e tij”, kanë thënë të afërmit.
