Rishi Sunak do jetë kryeministri i ri i Britanisë së Madhe. Ish-kancelari do të përmbushë kështu ëndrrën e tij për të marrë në dorë çelësat e Downing Street ditën e sotme, pasi rivalja e tij e vetme Penny Mordaunt ndoqi rrugën e Boris Johnson duke u larguar nga gara për lidershipin e Konservatorëve.
Sunak kështu emërohet zyrtarisht shefi i ri i partisë dhe Kryeministri i ardhshëm, teksa Mordaunt e pa të udhës të linte në mes garën, pasi e kishte të pamundur të arrinte pragun e 100 votave të nevojshme për të shkaktuar në balotazh.
Vetë Mordaunt postoi në Twitter për të pranuar se nuk mund ta çonte konkursin në fazën tjetër. “Rishi ka mbështetjen time të plotë”, ka shkruar ajo.
Kryeministri i ri do të mbajë një fjalim në Parlament në orën 14:30 dhe mund të vendoset në zyrën e tij të re që nesër, ndoshta edhe sonte.
Sunak mori mbështetjen publike nga mbi 190 deputetë konservatorë. Në krah të tij u rreshtuan edhe figura të njohura si James Cleverly, Brandon Lewis, Simon Clarke, Iain Duncan Smith, Priti Patel dhe Nadhim Zahawi.
Sunak do të jetë kryeministri i parë britanik me prejardhje indiane, pasi familja e tij emigroi në ishull në vitet ’60. Ai gjithashtu do të jetë shefi më i ri i qeverisë që nga Luftërat Napoleonike, pasi është në moshën 42-vjeçare.
Më herët, deputeti konservator, George Freeman, një figurë kyçe në fushatën e saj, theu radhët për të bërë të qartë se ajo tani duhet të qëndrojë mënjanë.
“Penny Mordaunt është një forcë e madhe për konservatorizmin; me historinë e jetës, vizionin dhe guximin për të ndihmuar në udhëheqjen e një ringjalljeje konservatore. Jam krenar që e mbështes”, shkroi ai në Twitter.
