Kryeministri Edi Rama ka komentuar për të parën herë pas 24 orëve vdekjen e 32-vjeçarit Laer Kurti në duart e efektivëve të policisë, që po e shoqëronin për në Komisariatin Nr.3.
Teksa ekspertiza përcaktoi se i riu ndërroi jetë si pasojë e gëlltitjes së lëndës narkotike kokainë, çka i ka shkaktuar mbidozë, ka ende hije dyshimi mbi deklaratat kontradiktore të AMP-së dhe Spitalit të Trumës.
Pikërisht për këtë mister që shoqëron ngjarjen, Rama akuzon opozitën, duke thënë nga një takim me fermerët në Elbasan se po hedhe baltë mbi Policinë e Shtetit padrejtësisht.
Rama priret që të mbrojë Uniformat Blu duke thënë se në zbatim të ligjit janë pezulluar nga detyra efektivët e patrullës që ndaluan Laer Kurtin në zonën e “Don Boskos”.
“Kanë që dje që akuzojnë Policinë e shtetit se kanë vrarë një djalë të ri, ndërkohë që policia ka pezulluar tre personat, është ngarkuar policia, është mjekësia ligjore që po bën punën e vet”, tha Rama.
Duke sulmuar indirekt kryedemokratin Sali Berisha pasi ishte ai që akuzoi AMP-në e drejtuar nga Ardi Veliu për falsifikim të provave të ngjarjes dhe përdhosje të viktimës, duke e lidhur me rastin e Klodian Rashës, Rama nuk e fsheh frikën se kjo ngjarje mund të nxjerrë qytetarët në protestë.
“Nuk është asgjë nga jashtë që u bë me të keq, të gjithë presin përfundimin, raporti i mjekësisë ligjore, çfarë lloj qeniesh janë këta, që u dalin njerëzve si gogol në atë ekrane që ju shikoni. Duan ta lidhin me atë tmerrin e madh që ishte, me atë të të ndjerit Klodian Rasha, duan t’i nxjerrin njerëzit rrugëve”, u shpreh kreu i qeverisë.
