Biznesmenit shqiptar, Gëzim Sallaku i janë sekuestruar gjashtë milionë euro pasuri nga Guardia di Finanza e Breshias në Itali.
Sipas CorrieredellaSerra autoritetet italiane kanë përfunduar hetimet për Sallakun dhe 68 persona të tjerë, me shqiptarin që në të kaluarën ka qenë edhe president i klubit të futbollit “Darfo”.
Biznesmenit i janë sekuestruar pasuri e paluajtshme që përfshijnë një vilë në Sale Marasino dhe një hotel. Gjithashtu GDF ka bllokuar para dhe sende me vlerë, falë hetimit që arriti në konkluzionin se kishte disproporcion mes të ardhurave të deklaruara nga Sallaku dhe pasurisë që ai zotëronte.
Për më tepër, për Sallakun është vendosur edhe detyrimi për të mos lëvizur jashtë territorit të komunës së vendbanimit.
Kujtojmë se biznesmeni ka qenë edhe më parë i përfshirë në çështje të tjera gjyqësore. Në vitin 2015 ai u arrestua dhe pak muaj më parë u shpall i pafajshëm në Mantova nga akuza e pastrimit dhe marrjes së mallrave të vjedhura.
Edhe policia shqiptare më 10 qershor 2021 njoftoi sekuestrimin e një pasurie me vlerë rreth 3 milionë euro, në pronësi të Gëzim Sallakut, vëllait të tij Saimir Sallakut dhe një personi tjetër, me të cilin dy vëllezërit kanë lidhje shoqërore, i identifikuar si Rabi Kurti.
Gjykata e Rrethit Gjyqësor Durrës vendosi asokohe sekuestron preventive për pronat e Gëzim Sallakut, të dyshuara të përfituara nga veprimtaria kriminale e tij, të cilat janë të regjistruara edhe në emër të shtetasve vëllait të tij dhe Rabi Kurtit.
Ato përfshinin:
– Sekuestro 100% të aksioneve të shoqërisë “GSA Sallaku” sh.p.k, me aktivitet “Import, eksport, tregti autoveturash, kamionësh etj”, me seli në Durrës, me ortak të vetëm dhe administrator shtetasin Gëzim Sallaku;
– 2 apartamente, në Durrës, në emër të shtetasit Gëzim Sallaku;
– 20.600 m2 sipërfaqe toke arë, në Durrës, në emër të shtetasit Gëzim Sallaku;
– 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës, në emër të shtetasit Gëzim Sallaku;
– Një godinë banimi dykatëshe dhe 2 apartamente banimi, në Durrës, në pronësi të shtetasit R. K.;
13 automjete të markave të ndryshme në pronësi të shoqërisë tregtare “GSA Sallaku”.
