Vdekja e veshur me mister e 32-vjeçarit Laer Kurti në duart e efektivëve të policisë së Komisariatit Nr.3 në Tiranë ka shkaktuar reagime të forta nga shoqëria dhe politika.
Pas kryetarit të Partisë Demokratike, Sali Berisha që akuzoi gjatë paradites policinë se ka ushtruar dhunë ndaj të riut në makinë dhe e ka çuar të vdekur në spitalin e Traumës pa thirrur as ambulancën, për ngjarjen ka reaguar edhe Partia e Lirisë.
Sipas sekretarit të Përgjithshëm të PL-së është Policia e Shtetit autore e kësaj ngjarje, të cilën e konsideron si vrasje.
“Duke u shprehur ngushëllimet më të sinqerta familjes së të ndjerit Lear Kurti, dënojmë me ashpërsi aktin kriminal të përsëritur të vrasësve me uniformë të Policisë së Shtetit, që po u marrin jetën të rinjve shqiptarë në rrugë dhe në ambientet e Komisariateve, si Klodian Rasha dhe Ilvi Meta”, shkruan Blushi në rrjetet sociale.
Në vijim ai bën thirrje për zbardhjen e rrethanave të vdekjes së Kurtit dhe vendosjen para përgjegjësisë së organeve ligj zbatuese që e lejuan një tragjedi të tillë.
“Humbja e një jete në një moshë kaq të re është jo vetëm një tragjedi familjare por trondit thellë besimin e të gjithë qytetarëve tek organet ligjzbatuese, misioni i të cilave është pikërisht mbrojtja e jetës, rendit dhe sigurisë publike. Bëjmë thirrje për zbardhjen sa më parë të rrethanave të vdekjes tragjike të të riut Lear Kurti dhe vendosjen përpara drejtësisë të përgjegjësve për këtë tragjedi të pajustifikueshme!”, nënvizon ai.
Në vijim, Sekretari i Përgjithshëm i PL kërkon edhe dorëheqjen e menjëhershme të ministrit të Brendshëm, Bledi Çuçi.
“Kjo ngjarje kaq tragjike, që ka tronditur sërish opinionin publik nuk do të jetë e fundit sa kohë në pushtet të jetë Edi Rama, Bledi Çuçi dhe falangat e tyre të inkriminuara në Policinë e Shtetit, që udhëhiqen me parimin: “Pa krim nuk ka zhvillim”. Ndaj u bëjmë thirrje të gjithë të rinjve në mbarë vendin të shprehin revoltën e tyre të fuqishme ndaj kësaj vrasje mizore që rëndon në ndërgjegjen e Edi Ramës dhe Bledi Çuçit. Ministri i Brendshëm duhet të japë menjëherë dorëheqjen”, shkruhet në deklaratë”, shprehet Blushi.
