FSHF ka publikuar sot listën e lojtarëve të përzgjedhur nga tekniku Edi Reja për të qenë pjesë e kombëtares shqiptare në sfidën miqësore të 26 tetorit, ku kuqezinjtë përballen me Arabinë Saudite në Abu Dhabi.
Në listën me 23 emra, bie në sy grumbullimi i shumë futbollistëve që luajnë me ekipe të kampionatit shqiptar dhe për shumicën është hera e parë që ftohen në përfaqësuesen kuqezi.
Vetëm 9 prej tyre janë lojtarë që vijnë nga klube të huaja dhe shumica kanë qenë pjesë e rregullt e Kombëtares.
Portierë janë Elhan Kastrati, Gentian Selmani dhe Arlis Shala. Ndërkohë, në mbrojtje janë thirrur për të bërë detyrën emra të spikatur të Superligës si Albion Marku, Erdenis Gurishta, Andi Hadroj, Esin Hakaj, Rudolf Turkaj, Stivian Janku, Ardit Toli, Enea Bitri. Grupit i shtohet edhe ish-talenti i AEK-ut Mario Mitaj, i cili tanimë aktivizohet me Lokomotivën e Moskës.
Në mesfushë janë thirrur emra si Esat Mala, Sherif Kallaku, Lorenco Vila, Arbnor Muçolli, Ardit Deliu, Arinaldo Rrapaj.
Gjithashtu rikthehen në kombëtare Odise Roshi dhe Bekim Balaj. I besuari Sokol Cikalleshi do të jetë gjithashtu pjesë e ekipit, ndërsa do të testohen në sulm Xhuljano Skuka dhe Redon Xhixha.
Përfaqësuesja do të nisë grumbullimin më datë 22 tetor në kompleksin Tropikal në Durrës dhe më datë 24 tetor do të udhëtojë për në Abu Dhabi ku do të vijojë përgatitjet për duelin miqësor.
Ndeshja e parë në histori e Shqipërisë me Arabinë Saudite do të zhvillohet në “Al Nahyan Stadium” dhe do të nisë në orën 18:30 sipas orës lokale (16:30 sipas orës shqiptare).
