Dita e tretë e vitit të ri akademik në Shqipëri ka vijuar me bojkot nga ana e pedagogëve, të cilët vijojnë të mos tërhiqen nga kërkesa e tyre për rritjen e pagave dhe financim të shtuar për kërkimin shkencor nga ana e qeverisë.
Në Fakultetin e Shkencave të Natyrës asnjë pedagog nuk është paraqitur për të vazhduar mësimdhënien dhe auditorët janë boshatisur edhe nga studentët, shumica e të cilëve e përkrahin kauzën.
Ndërkohë, Sindikata e Pedagogëve duket se ka vendosur të ndryshojë strategji për protestën, ndoshta e ndikuar edhe prej deklaratës së djeshme të kryeministrit Edi Rama, i cili përjashtoi në mënyrë kategorike rritjen e pagave në mënyrë uniforme për ta.
“Koha kur qeveria rrit pagat në mënyrë uniforme sepse kërkojnë sindikatat ka mbaruar bashkë me reformën e Arsimit të Lartë. Autonomia është liri dhe përgjegjësi. Kjo është hera e fundit që ne bëjmë rritje page uniforme. Do të mbështesim më shumë ata që ndihmojnë më shumë shoqërinë dhe iu shërbejnë më shumë studentëve. Dhe do të jetë rritje page e kombinuar midis mbështetjes nga shteti dhe të ardhurave që universiteti siguron jo nga tarifa e studentëve por nga futja si aktor në treg”, tha ditën e djeshme kryeministri.
Sakaq sot, Sindikata njofton se nesër në orën 11:00 përpara Godinës së Korpusit të Universitetit Politeknik do të zhvillohet një tubim në formën e bojkotit total të mësimit, ku pritet të marrin pjesë pedagogët nga të gjitha Universitetet Publike të vendit.
Ndër të tjera në njoftimin e sindikatës për protestën i bëhet thirrje edhe studentëve për t’iu bashkuar, ndërsa theksohet se vetëm uniteti në qëndrimin për të drejtat e tyre do të detyrojë qeverinë që të dëgjojë kërkesat.
