Policia e Himarës ka arrestuar një të ri i cili u kap teksa po transportonte emigrantë të paligjshëm kundrejt pagesës.
Sipas njoftimit të policisë, në pranga ka rënë shtetasi Klinton Shehaj, ndërkohë grupi hetimor po punon për dokumentimin e plotë të rastit të trafikimit të emigrantëve. Arrestimi i këtij shtetasi u bë pasi u kap në flagrancë në afërsi të fshatit Piqeras, duke transportuar 7 emigrantë të paligjshëm, 2 prej të cilëve sapo i kishte futur në automjet.
“Finalizohet me sukses operacioni policor i koduar “Piqeras”. Tentoi të transportonte 7 emigrantë të paligjshëm, vihet në pranga 21-vjeçari. Shërbimet e Komisariatit të Policisë Himarë, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, në bazë të informacioneve policore, kanë organizuar dhe finalizuar me sukses operacionin policor “Piqeras”, si rezultat i të cilit u arrestua në flagrancë shtetasi K. Sh., 21 vjeç”, njofton policia.
Materialet i kaluan Prokurorisë pranë Gjykatës së Shkallës së Parë Vlorë, për veprën penale “Ndihma për kalim të paligjshëm të kufijve”.
