Armando Broja ka qenë sot për herë të parë në karrierë titullar me skuadrën e Çelsit në Premier Ligë. Por një paraqitje e mirë e tij nuk ka mjaftuar që të ndihmojë skuadrën që të marrë fitoren e radhës.
Pas katër fitoreve radhazi në kampionat, Çelsi është ndalur në një barazim pa gola përballë Brentford, në radhët e të cilit mungonte Thomas Strakosha për dëmtim.
Në pjesën e parë të ndeshjes, Broja krijoi raste para portës, por nuk ia doli t’i finalizonte, ndërsa as shokët e skuadrës nuk përfituan nga shpërthimet e tij. Poter la lojtarin shqiptar në fushë derisa kaloi një orë lojë, duke i bërë vend Sterling më pas. Por Çelsi përsëri nuk ishte më thumbues në sulm dhe në rastet kur ia doli të shfaqej para portës, Raja ndaloi tentativat drejt saj.
Kështu, sfida u mbyll në barazim 0-0, që mban Çelsin në vendin e katërt në klasifikim, që është objektivi i këtij sezoni për blutë.
