Një 27-vjeçar shqiptar i identifikuar si Lumtur Zeqja është vrarë në një përleshje në rrugë jashtë një stacioni të metrosë në lindje të Londrës.
Ngjarja raportohet se ka ndodhur pak para orës 23:00 të së dielës (16 tetor).
Policia nxitoi në vendngjarje në Church Lane pasi një person i njoftoi përmes telefonit për një “përleshje”.
Aty gjetën 27 vjeçarin që u shpall i vdekur në vendngjarje dhe një tjetër të plagosur i cili u dërgua me urgjencë në spital. Raportohet se është në gjendje të qëndrueshme mjekësore, jashtë rrezikut për jetën.
Asnjë arrestim nuk është bërë dhe personi përgjegjës për sulmin është ende i lirë dhe policia tha se ka një sërë pistash të ndryshme.
Inspektori Adam Callaghan tha: “Hetimi ynë po ecën me ritëm dhe ne po ndjekim një sërë linjash hetimi. Prioriteti ynë është gjetja e personit përgjegjës dhe gjetja e drejtësisë për viktimën dhe familjen e tij”.
Familja e Lumturi Zeqjas është informuar dhe do të bëhet ekspertiza pas vdekjes. Oficerët e mjekësisë ligjore kanë qenë në vendin e ngjarjes mëngjesin e sotëm (17 tetor) duke mbledhur provat.
Kryeinspektori Simon Crick, drejtuesi i policisë në Waltham Forest dhe Neëham, tha: “Mendimet dhe ngushëllimet e mia janë me familjen dhe miqtë e z. Lumturi për humbjen e tyre tragjike. Unë mund të kuptoj se ky incident do të ketë shkaktuar shqetësim dhe tronditje në komunitetin lokal dhe do të doja të siguroja banorët se do të kemi oficerë lokalë që do të patrullojnë në zonë. Ju lutemi flisni me këta oficerë; ata do të ndihmojnë në zbutjen e çdo shqetësimi që mund të keni.”
