Detaje të reja u zbuluan sot nga operacioni policor që Uniformat Blu zhvilluan katër ditë më parë në zonën e Belshit, ku u zbuluan arsenale armësh, lëndë narkotike dhe para cash në banesat e Aqif Bezatit dhe Veli Deliut.
Dyshohet se në banesën e 60-vjeçarit Bezati, i cili njihet edhe si lidhje e ngushtë shoqërore e Talo Çelës, përveç materialeve dhe parave të sekuestruara është gjetur edhe një shumë prej mbi 100 mijë euro.
Kjo shumë parash nuk rezulton të jetë e regjistruar në procesverbalet e policisë dhe nga burime bëhet me dije se dyshohet që një punonjës policie mund t’i ketë marrë dhe përvetësuar gjatë aksionit.
Dyshimet qëndrojnë pasi polici ka shkuar në banesën e Bezatit, ku u gjetën shumë të mëdha parash, më përpara se kolegët e tij. Agjencia e Mbikëqyrjes Policore në Elbasan ka nisur hetimet për efektivin, ndërsa ende nuk bëhet me dije identiteti i tij.
Kujtojmë se kontrollet në banesën e Aqif Bezatit u zhvilluan më 13 shtator nga punonjës të policisë së postës, rajoni i policisë që varet nga Komisariati i Policisë Cërrik.
