Në periudhën më të vështirë për shqiptarët, atëherë kur kriza ekonomike dhe çmimet e larta të karburantit dhe energjisë kanë goditur fort çdo shqiptar, kryeministri Edi Rama duket se ka kompletuar ëndrrën e tij 6 milionë dollarëshe për të çuar në hapësirë satelitet “Albania 1 & 2”.
Tenderi për këtë ide të Ramës u hap në fillim të shtatorit nga Agjencia e Mbrojtjes Civile dhe kompania fituese u shpall “Satellogic USA” Inc, e cila prodhon mikrosatelitë që sipas qeverisë do monitorojë “frikshëm” tokën shqiptare.
Ndërkohë, teksa shefi i qeverisë nuk e mbajti fjalën për t’i hedhur në orbitë këta dy satelitë në muajin mars të këtij viti, sot nëpërmjet një postimi në Facebook njofton se dy satelitët janë gati.
“Gati për t’u lëshuar në hapësirë nga Kennedy Space Centre në Florida të SHBA, dy sytë superteknologjikë që do të monitorojnë Shqipërinë nga lartësitë, me një precizion të lartë dhe qartësi të plotë figure deri në 75 cm2; Satelitët e ALBANIA 1 dhe ALBANIA 2. Shqipëria do të ketë përdorim ekskluziv të tyre, për përpunimin e Informacionit Gjeohapësinor (GIS) si dhe ofrimin e produkteve të imazherisë dhe komponentëve të tjerë të saj, e një sërë institucioneve e subjekteve, publike ose private, puna e të cilave lidhet me territorin, ujërat, pyjet, zjarret, mbetjet urbane, prodhimin bujqësor, zhvillimin urban, titujt e pronësisë, e me radhë”, shkruan Rama në FB.
Dy satelitet që shohim në foton e publikuar nga kryeministri nuk janë në formën e zakonshme të objekteve që hidhen në hapësirë, por sipas shpjegimit të qeverisë ato do të jenë të afta të monitorojnë ndërtimet pa leje në vend (veçanërisht kullat në Tiranë”, të cilat s’ka sy t’i shohë pushteti.
Këto satelitë gjithashtu do të bëjnë më efektive bujqësinë, pasi sipas ministres Frida Krifca do të monitorohet nga qielli çdo hapësirë e kultivuar nga fermerët shqiptarë.
Sa i përket kompanisë “Satellogic” që ka ekskluzivitetin e monitorimit të Shqipërisë nga hapësira, ajo u themelua në vitin 2010, nga 40-vjeçari argjentinas Emiliano Kargieman.
Rrënjët e saj janë të shtrira në në SHBA, Spanjë, Argjentinë, Kinë dhe Izrael, ndërsa në 2025 kompania planifikon të lëshojë 300 mikrosatelitë në orbitë
Qellimi i saj është të krijoje një katalog live te globit, monitorimi me satelite sipas themeluesit Kargieman është i detajuar deri në 40 centimetra deri në 70 centimetra pranë tokës, ndërsa gjithë informacioni që kompania gjeneron përqark botës është 280 petabajt në vit.
Kompania “Satellogic” ka hedhur ne orbite katër satelite në muajin maj të këtij viti në bashkëpunim te ngushte me kompaninë Space X te miliarderit Elon Musk.
