Prokuroria e Posaçme kundër Korrupsionit dhe Krimit të Organizuar (SPAK) ka kërkuar nga Gjykata konfiskimin e pasurive të Redjan Rajës.
Nip i deputetit të PS-së, Redjan Raja është një personazh i njohur për drejtësinë dhe policinë pasi emri i tij shpesh herë është lidhur me botën e krimit. Në njoftimin e publikuar nga SPAK kërkohet sekuestrimi i 7 pasurive që zotëron Redjan Raja, një shumë të caktuar parash dhe sende të tjera me vlerë.
Nëse GJKKO pranon kërkesën e SPAK, pasuritë e Rrajës, do t’i kalojnë shtetit shqiptar. Ndërkohë, sjellim në vëmendje se pas një vendimi të marrë më datë 23 tetor të 2021, GJKKO vendosi të sekuestrojë një apartament në Tiranë; tre dyqane; dy garazhe; dy makina tip “Audi A8”; një makinë tip “Bentley”; një orë Rolex dhe 2 750 euro.
Shkak i konfiskimit, është akuza e ngritur ndaj tij për atentatin ndaj ish-prokurorit Arjan Ndoj në Shkozet të Durrësit. Ngjarja ndodhi në 1 nëntor 2019, kur nga atentati mbeti i plagosur prokurori Ndoj. Prokuroria pretendoi se provat e gjendura në makinë, duke përfshirë ADN përputheshin me ato të nipit të deputetit socialist.
Rrahja, nuk e ka pranuar akuzën se ka qenë i përfshirë në ngjarje. Por në automjetin e autorëve të atentatit, që u gjend e braktisur në Shkafan, u gjetën një palë syze, ku rezultuan gjurmët e gishtërinjve të Redjan Rrahjes. Ky i fundit u arrestua kur po tentonte të largohej nga Shqipëria.
PROKURORIA E POSAÇME KUNDËR KORRUPSIONIT DHE KRIMIT TË ORGANIZUAR:
“Bazuar në parashikimet e Ligji nr. 10192 datë 03.12.2009 “Për Parandalimin dhe Goditjen e Krimit të Organizuar dhe Trafikimit Nëpërmjet Masave Parandaluese kundër Pasurisë”, Prokuroria e Posaçme Kundër Korrupsionit dhe Krimit të Organizuar ka regjistruar në datën 22.01.2021 procedimin pasuror nr.2, në ngarkim të shtetasve Redjan Rraja etj.
Në funksion të hetimeve të këtij procedimi pasuror janë kryer shumë veprime hetimore dhe në përfundim të tyre sot në datën 13.10.2022 Prokuroria e Posaçme Kundër Korrupsionit dhe Krimit të Organizuar ju drejtua Gjykatës me kërkesën për konfiskim të pasurive si më poshtë:
Pasuria apartament, me sip 76 m2 (Tiranë), regjistruar në emër të shtetasit R. Rraja.
Pasuria, me sip 30 m2, njësi (Tiranë), regjistruar në emër të shtetasit R. Rraja.
Pasuria njësi me sip 127.5 m2 (Tiranë), e regjistruar në emër të shtetases M. Ç. por që është në zotërim të tërthortë nga shtetasi R. Rraja.
Pasuria garazh me sip totale 18.09 m2 (Tiranë), regjistruar në emër të shtetases M. Ç. por që është në zotërim të tërthortë nga shtetasi R. Rraja.
Pasuria garazh me sip totale 18.09 m2 (Tiranë), regjistruar në emër të shtetases M. Ç. por që gjendet në zotërim të tërthortë të shtetasit R. Rraja.
Automjeti me ngjyrë gri të tipit Audi, A8, sekuestruar shtetases K. K. por që është në zotërim të tërthortë të shtetasit R. Rraja.
Automjeti me targë Audi A8, regjistruar në emër të R. Rraja.
Një orë dore Roleks.
Shuma prej 2750 Euro.
Këto pasuri janë sekuestruar me vendimin nr.22 datë 23.10.2021 të Gjykatës së Posaçme e Shkallës së Parë për Korrupsionin dhe Krimin e Organizuar”
