Ashtu siç ishte paralajmëruar, sot në orën 11:00 ka nisur protesta e pedagogëve para Universitetit të Arteve. Shoqata e Pedagogëve i kanë paraqitur qeverisë disa kërkesa, mes tyre dhe më e rëndësishmja rritja e pagave të cilat sipas tyre duhet të jenë në të njëjtin nivel me vendet e tjera të rajonit.
Pedagogët kërkojnë rritje 50 % të pagës, me dy faza 30 % një vit dhe 20 % vitin tjetër, ndërsa në këtë mënyrë kanë refuzuar propozimin e kryeministrit Edi Rama për rritjen e pagave në nivelin e 7%.
Pedagogu, Ardian Isufi i cili mbajti i pari fjalimin u shpreh se ata po protestojnë për të dinjitet. Ai renditi disa dështime të qeverisë në fushën e arsimit, duke theksuar se janë reduktuar fondet.
“Hapim këtë protestë me shprehjen të Fan Nolit, “çdo vend çlirohet me përpjekjet e veta”. Edhe përpjekja jonë sa vjen bëhet më e fortë. Qeveria në sektorin e arsimit ka bëtë shkurtime mbi 1.6 mld lekë. Pra nga buxheti fillestar i parashikimet. Shpenzimet kanë pësuar shkurtim. Fondet për arsimin bazë dhe të mesëm janë reduktuar. Fakt është që jemi vendi i fundit në Evropë për pagën e pedagogët, më poshtë se Bosnje Hercegovina. Kjo gjendje flet vetë pse rinia ikën nga Shqipëria. Të qëndrojmë fort me kërkesat tona, që çdo ditë po i bashkohen kërkesat e studentëve. Kjo është protesta juaj dhe e shoqërisë shqiptare”, u shpreh ndër të tjera Isufaj.
Ndërsa kreu i Sindikatës së Pedagogëve, Sandër Kovaçi në protestën e sotme para Universitetit të Arteve, tha se kërkesat e tyre kryeministri i quajti ultimatume, duke shtuar se pagat e pedagogëve nuk janë në përputhje me tregun e punës.
“Ka pasur keqkuptime mbi përmbajtjen e peticionit, ka pasur sugjerime që propozimi të përfundojë me një manifest. Ne e kemi thënë që nuk bëhet fjalë për rrogën e një pedagogu që të mbajë familjen e tij, por që të jetë dinjitoz. Kemi kërkuar rritje 30% këtë vit dhe 20 % vitin e ardhshëm. Duke u nisur nga kriza ekonomike ne e kemi zbritur kërkesën duke qenë solidarë me këtë situatë. Kërkesat tona kryeministri i quajti ultimatum, por i themi kryeministrit ta shikojë universitetin me një sy tjetër. Sot gjendja e profesoratit është në një tjetër gjendje dhe nuk është marrë parasysh asnjë kërkesë dhe nuk ka pasur rritje. Nëse e krahasojmë me Kosovën ka ardhur koha të mos themi që ta bëjmë Shqipërinë si gjithë Europa, por ta bëjmë si Kosova”, tha Kovaçi.
Kjo protestë vjen pak ditë para nisjes së vitit të ri akademik, ku pedagogët kanë paralajmëruar se do të ketë bojkotim nëse nuk do të plotësohen kërkesat e tyre nga qeveria shqiptare.
- KËRKESAT E PEDAGOGEVE
Rritja e pagave për pedagogët dhe stafin ndihmës
Rritja e financimit për kërkimin shkencor Rivendosja e shtesave mbi pagë për ‘Dëshmi shëndeti në punë’
Rritja e shtesës mbi pagën për vjetërsinë në punë
Rritja e pagesës së orëve të ngarkesës suplementare
Rivlerësimi i orës mësimore pasi ka zbritje prej 50% të pagesës së orës mësimore si rezultat i mos diferencimit të orës mësimore të leksionit.
Rishikimin e tatimit prej 23% mbi pagesën e ngarkesës suplementare
Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
Të bëhet transparencë mbi buxhetin dhe të ardhurat e universitetet publike.
