Polonia u ka kërkuar qytetarëve të saj që të largohen nga Bjellorusia fqinje me shpejtësi, vetëm pak orë pas valës me 83 raketa që Rusia lëshoi mbi Ukrainë dhe që goditën rëndë Kievin duke shkaktuar të paktën 11 viktima.
Gjithashtu mediat britanike raportojnë se Varshava zyrtare ka urdhëruar kryerjen e kontrolleve teknike në vendstrehimet e saj kundër sulmeve me bomba, menjëherë pasi diktatori Alexander Lukashenko njoftoi një “task-forcë të përbashkët ushtarake” me Rusinë.
Lukashenko njoftoi se njësitë ruse do të kombinohen me të tijat dhe do të vendosen në kufirin me Ukrainën, duke akuzuar Kievin se planifikon të sulmojë me ndihmën e aleatëve Poloninë dhe Lituaninë.
Ndërkohë, Varshava thotë se marrëdhëniet midis dy vendeve janë bërë gjithnjë e më të tensionuara, pjesërisht për shkak të luftës në Ukrainë.
“Ne rekomandojmë që qytetarët polakë që qëndrojnë në territorin e Republikës së Bjellorusisë të largohen nga territori i saj me mjete tregtare dhe private në dispozicion”, tha qeveria në udhëzimin për udhëtarët e publikuar në faqen e saj të internetit.
Polonia gjithashtu pretendon se pakicat e saj në Bjellorusi përballen me represion nga shteti, me disa liderë të komunitetit që janë burgosur.
