Nga Boldnews.al
Kryetari i Bashkisë së Tiranës, Erion Veliaj, e konsideron zonën rreth liqenit të Farkës si “mushkëria e dytë”, pas kodrave të Liqenit Artificial.
Në një qytet të betonizuar, çdo oaz me pemë e lule është i mirëpritur, aq më tepër që qytetarët janë të etur për të parë ngjyrën e gjelbër.
Për të jetësuar atë që Veliaj e konsideron si “mushkëri të dytë”, Bashkia e Tiranës ka vendosur në fillim të vitit 2022 që të shpenzojë edhe plot 5.7 miliardë lekë të vjetra, për “ndërtimin e pedonales, pistë vrapimi dhe korsi biçikletash në liqenin e Farkës”.
Por, sa e vërtetë është iniciativa e Veliajt për të ofruar “oazin” për qytetarët e Tiranës?
Disa pamje video të siguruara nga “Boldnews.al” tregojnë se thuajse e gjithë zona rreth liqenit të Farkës është e përfshirë nga “virusi betonizues”.
Përreth brigjeve të gjelbra të Liqenit janë duke u ndërtuar komplekse vilash private dhe ndërtime të tjera, në funksion të aktivitetit privat.
Nga pamjet duket se aksesi i qytetarëve të thjeshtë të Tiranës, admiruesve të natyrës dhe çiklizmit, do të jetë shumë i vështirë në këtë zonë, pasi “vilat e bosëve” dhe ambjentet rrethuese për komplekset private të kenë përfunduar ndërtimin.
Pamjet e tanishme tregojnë se Liqeni i Farkës jo vetëm që nuk është “mushkëri”, por, përkundrazi ajo është ndotëse për qytetarët dhe zonën përreth, për shkak të pluhurit dhe betonit që ka pushtuar brigjet e tij.
Bazuar në këto pamje, ngrihet një pikëpyetje e fortë- investimi 5 milionë euro për pistë vrapimi e biçikletash është për qytetarët apo është një shpenzim luksoz me paratë publike që do të shijohet nga “zengjinët e rinj” shqiptarë, të cilët kanë mundësinë për të harxhuar qindar mijëra euro për vileta në zonën e Liqenit të Farkës?
