Kaos për stolin te klubi i Superiores para duelit të javës së 7-të, ja çfarë ndodhi

Para fillimit të ndeshjes së djeshme, pati një dilemë se kush do të drejtonte Laçin, për shkak të një fatkeqësie familjare që i kishte ndodhur trajnerit malazez, Dejan Vukiçeviç, pak ditë më parë.

“Panorama Sport” mësoi se deri në ditën e ndeshjes, ka qenë trajneri krutan, Ramadan Ndreu, i cili ka stërvitur ekipin në tri seanca, i ndihmuar nga asisteni i Vukiçeviçit, Klevis Hima. Mirëpo, pak orë para fillimit të takimit, malazezi kishte njoftuar drejtuesit e klubit se do të mbërrinte në Tiranë nga Podgorica.

Kësisoj, ai e drejtoi vetë skuadrën kundër bardhebluve dhe më në fund pas pesë humbjeve radhazi, arriti të merrte një pikë shprese për vazhdimësinë, pasi dje mund të ishte edhe ndeshja e tij e fundit nën drejtimin e Laçit nëse regjistrohet një tjetër disfatë.

Interesant është fakti se Vukiçeviç u shfaq në stadiumin “Selman Stërmasi”, i shoqëruar pikërisht nga Ndreu, i cili më parë ka qenë trajner dhe drejtor teknik te kurbinasit. Presidenti Pashk Laska i ka dhënë besim absolut malazezit deri më tani, edhe pse në shtatë javë kampionat, Laçi ka vetëm katër pikë.