Policia e Elbasanit ka zbardhur ngjarjen e ndodhur mbrëmjen e djeshme në “Urën e Zaranikës”, ku Forcat e Ndërhyrjes së Shpejtë gjatë një aksioni bli për kapjen e personave të shpallur në kërkim, hapën zjarr ndaj një automjeti që nuk i ndaloi postbllokut.
Sipas Uniformave Blu personi që drejtonte automjetin, i cili kaloi përmes postbllokut është Xhafer Deliu.
43-vjeçari është vënë në pranga nga policia pasi ka thyer masën e sigurisë “arrest në shtëpi” dhe merrej me shpërndarje të drogave të forta në qytetin e Elbasanit.
Gjatë kontrolleve policia i gjeti edhe 525 gramë lëndë të dyshuar narkotike heroinë dhe 2 aparate celular.
Njoftimi i policisë:
Finalizohet operacioni policor i koduar “Zaranika”, pas një hetimi proaktiv.
Operacioni, nga Seksioni për Hetimin e Narkotikëve dhe Seksioni Operacional, në DVP Elbasan, në bashkëpunim me forcat e FNSH Fier, nën drejtimin e Prokurorisë pranë Gjykatës së Rrethit Gjyqësor Elbasan.
Vihet në pranga 43-vjeçari që ushtronte këtë veprimtari, i cili kishte thyer masën e sigurisë “Arrest në shtëpi”.
Në vijim të punës për goditjen e veprimtarisë kriminale në fushën e narkotikëve, si dhe në kuadër të hetimit proaktiv për një shtetas që merrej me shpërndarje të drogave të forta, në qytetin e Elbasanit, u organizua dhe u finalizua me sukses operacioni policor i koduar “Zaranika”, në kuadër të të cilit u bë kapja dhe arrestimi në flagrancë i shtetasit:
Xh. D., 43 vjeç, banues në Elbasan. Ky shtetas ishte me masë sigurie “Arrest në shtëpi”, për veprën penale “Dhuna në familje”. Gjithashtu ka qenë i dënuar më parë, për veprën penale “Mbajtja pa leje e armëve luftarake dhe e municionit”.
Gjatë kontrollit në banesën e tij, shërbimet e Policisë gjetën dhe u sekuestruan në cilësinë e provës materiale 525 gramë lëndë të dyshuar narkotike heroinë dhe 2 aparate celuare.
Vijon puna për identifikimin e personave të tjerë të impikuar në këtë veprimtari kriminale.
Materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
