Britania e Madhe është vendosur në alarm, pasi ka dyshime se Rusia mund të ketë vendosur mina në pika nevralgjike të rrjetit të kabllove oqeanike, që furnizojnë me energji dhe internet vendin.
Sipas DailyMail, ministrat kanë urdhëruar një studim urgjent të kabllove të energjisë nënujore dhe të internetit mes frikës se Rusia mund t’i ketë vënë në shënjestër ato.
Sekretari i Mbrojtjes Ben Wallace ka dërguar këtë javë anije luftarake në Detin e Veriut për të penguar çdo tentativë për sulm nga ana e Kremlinit pas shpërthimeve në tubacionin kryesore të gazit “Nord Stream” në Balltik.
Ministrat britanikë gjithashtu i kanë kërkuar “Marinës” të kryejë një studim të tubacioneve dhe kabllove kritike në rast se Rusia ka vendosur tashmë mina në distancë.
“HMS Somerset”, një fregatë e tipit 23 me aftësi gjurmuese nënujore, u vendos në Detin e Veriut këtë javë si një pengesë për çdo sulm rus. Anija survejuese “HMS Enterprise” është dërguar gjithashtu në zonë.
Autoritetet daneze po hetojnë ndërkohë shpërthimet në tubacionet Nord Stream 1 dhe 2, të cilat kanë intensifikuar krizën energjetike të Evropës.
Moska ka mohuar përgjegjësinë për sabotimin, duke theksuar se ajo zotëron tubacionet e përfshira, por zyrtarët perëndimorë besojnë se Kremlini ka të ngjarë të ketë urdhëruar sulmet ndërsa Vladimir Putin përpiqet të armatizojë furnizimet me energji si hakmarrje për sanksionet e vendosura pas pushtimit të tij në Ukrainë.
“Të gjithë po e shikojnë hetimin danez shumë nga afër. Natyrisht që ekziston çështja e atribuimit – a do të gjejnë ata prova për të drejtuar zyrtarisht gishtin drejt Rusisë? Por ekziston edhe pyetja se si u bë. Ishte një sulm i drejtpërdrejtë? Apo ishin minat e paravendosura disa kohë në të kaluarën dhe u shpërthyen nga distanca? Nëse është kjo e fundit, atëherë ngre pyetje se ku tjetër mund të jenë vendosur minat”, tha një burim qeveritar për median angleze.
Ky burim gjithashtu shtoi: “Ne e dimë se ka pasur aktivitet të dyshimtë të nëndetëseve ruse rreth infrastrukturës sonë nënujore prej vitesh. Kështu që ne duhet të shkojmë dhe të shohim. Është një shqetësim sepse ne e dimë se Putini nuk i bindet asnjë norme konvencionale”.
Wallace tha në konferencën e Partisë Konservatore të kësaj jave se dëmi “misterioz” i shkaktuar në tubacionet Nord Stream duhet të shërbejë si një kujtesë se si infrastrukturës dhe ekonomisë së Mbretërisë së Bashkuar “të brishtë” iu dha kërcënimi i “sulmeve hibride”.
“Shtetet nordike dhe ne jemi thellësisht të prekshëm ndaj njerëzve që ndërhyjnë në kabllot dhe tubacionet tona“, tha ministri i Mbrojtjes.
Në Britani, ekziston shqetësim i veçantë për tubacionin “Langeled”, i cili transporton gaz natyror nga Norvegjia në ishull.
