Bordi i Transparencës ka publikuar çmimet e reja të karburanteve, që hyjnë në fuqi nga sot në orën 18:00.
Bordi i ngritur nga kryeministri Edi Rama ditën e sotme e ka çuar çmimin me pakicë të naftës në 245 lekë/litër, me një rritje rekord prej 22 lekësh që nga fillimi i funksionimit të tij në mars të këtij viti. Në vendimin e fundit të datës 1 tetor, nafta tregtohej 223 lekë/litër në një kohë kur çmimi i saj në bursën ndërkombëtare ishte në “pikiatë”, kurse bordi i Ramë tallet me xhepat e shqiptarëve duke bërë ulje qesharake. Në momentin kur çmimi i naftës rritet sadopak në bursë, e menjëhershme është reagimi i këtij bordi duke vendosur rritje abuzive të çmimeve.
Sipas vendimit të sotëm me rritje është edhe çmimi i benzinës, që do të tregtohet me 204 lekë, nga 198 lekë që ishte në vendimin e 1 tetorit. Kurse gazi do të tregtohet me 77 lekë për litër.
Gjatë ditës së sotme, një fuçi naftë u tregtua me gati 96 dollarë. Ndonëse në bursa ky tregues është pothuajse në nivelet e fund shkurtit, përpara se të fillonte lufta, dhe kur në vend tregtohej me rreth 190 lekë për litër, operatorët e tregut pohojnë se shumë faktorë kanë ndryshuar që nga ajo kohë, duke filluar që nga dollari, që ka arritur në gati 120 lekë dhe rritja e kontratave të treguesit Platts, që është bursa referencë ku blejnë kompanitë shqiptare. Kontrata e Platts për tetorin është 1224 USD/ton dhe për nëntorin 1125,50 USD/ton.
Ndërkohë, ndërhyrjet e Bordit përmes fiksimit të çmimeve tavan të pakicës që nga fillimi i marsit nuk kanë arritur të frenojnë rritjen e çmimeve, që po i afrohet sërish niveleve maksimale prej 260 lekë për litër që arritën në vend në mars. Përkundrazi operatorët pohojnë se Bordi po i pengon kompanitë të jenë fleksibël me blerjet që do u mundësonte atyre të manovronin më çmimet.
Kujtojmë që opozita ka kërkuar “shkrihen” në mënyrë urgjente të bordeve të cilat etiketohen si “komuniste” pasi abuzojnë me çmimet në dëm të xhepave të qytetarëve./ MONITOR
