Arrestohet në Durrës një 55-vjeçar i shpallur në kërkim ndërkombëtar për veprën penale trafikim të lëndëve narkotike.
Në prangat e policisë ka rënë shtetasi Edmond Kanakçiu (Kondakçiu) i cili është dënuar në Itali me 25 vjet e 8 muaj burg dhe pritet të ekstradohet së shpejti përtej Adriatikut.
“Në vijim të punës për kapjen e personave të kërkuar kombëtarisht dhe ndërkombëtarisht, shërbimet e Forcës së Posaçme Operacionale të DVP Durrës, në bashkëpunim me Interpol Tirana, në kuadër të operacionit policor të koduar “Koordinatat”, bënë kapjen dhe arrestimin provizor, me qëllim ekstradimin, të shtetasit në kërkim ndërkombëtar:
-Edmond Kanakçiu (Kondakçiu), 55 vjeç, banues në lagjen nr., 13 Durrës, pasi autoritetet gjyqësore të Perugia-s, Itali, pas dhënies së vendimit për dënimin e 55-vjeçarit me 25 vjet e 8 muaj burgim, për veprën penale “Trafikimi i lëndëve narkotike”, kanë lëshuar urdhër arresti ndërkombëtar në ngarkim të tij”, njofton policia e Durrësit.
Materialet i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme.
