Një nga të arrestuarit e operacionit policor “Porositësi” që çoi në goditjen e një grupi killerash nga zona e Durrësit, pas rrëfimit të disa ngjarjeve kriminale dhe atentateve nga vëllezërit Indrit dhe Gentian Beqiraj, është polici i Burgjeve, Flamur Bejko.
Vëllezërit Beqiraj teksa “zbërthyen” masakrën e Don Boskos kanë zbuluar se edhe Bejko i ka paguar 3500 euro paraprakisht për të realizuar një atentat me lëndë eksplozive.
“Gjithashtu, dy vëllezërit janë kontaktuar dhe porositur edhe nga shtetasi F.B., që kundrejt pagesës të kryenin vrasjen e shtetasve S.Z. dhe I.H. Për këtë veprimtari kriminale, vëllezërit kanë marrë një shumë paraprake prej 3500 eurosh dhe kanë siguruar mjetet për realizimin e kësaj ngjarjeje dhe konkretisht 4 kg eksploziv, si dhe një armë zjarri automatik, të cilat janë gjetur dhe sekuestruar gjatë kontrolleve të ushtruara nga shërbimet e Policisë, gjatë datës 3 tetor 2022”, tha në një konferencë për mediat këtë të Martë drejtori i Policisë së Durrësit, Skënder Hita.
Por, efektivi i policisë së Burgjeve ka mohuar në dëshminë e tij para hetuesve të çështjes, që të ketë porositur apo parapaguar për të vrarë dy persona që e kishin rrahur, siç pretendojnë dy “pentitot” e drejtësisë.
52-vjeçari ka treguar se shumën prej 3500 euro ia ka dhënë vëllezërve Beqiraj sepse njëri prej tyre ia ka kërkuar me qëllim për të plotësuar dokumentet e banimit në Greqi, sipas Neës24.
Ende nuk dihet ende nëse Flamur Bejko ka marrë urdhër nga dikush tjetër për atentatin që kishte kontaktuar me vëllezërit Beqiraj.
Ndërkohë, mbi Bejkon rëndojnë akuzat për veprat penale “Mbajtja pa leje dhe prodhimi i armëve, armëve shpërthyese dhe i municioneve” dhe “Sigurimi i kushteve dhe mjeteve materiale për kryerjen e vrasjes”, kryer në formën e grupit të strukturuar kriminal.
