CEO i Teslas dhe njëherësh multimiliarderi, Elon Musk i surprizoi të gjithë teksa postoi në Twitter modelin e tij për të çuar Ukrainën dhe Rusinë drejt një marrëveshje për paqen në të ardhmen e afërt.
Por çuditërisht, duket se Rusia i ka dalë në mbështetje sugjerimit të tij për ‘marrëveshjen e paqes’, pasi miliarderi u përball me një reagim të madh kundër tij në internet, pasi sugjeronte që Ukraina duhej të qëndronte neutrale përballë pushtimit të përgjakshëm të Vladimir Putinit.
Kremlini tha të martën se ishte një “hap pozitiv” që Musk po përshkruante një marrëveshje paqeje, vetëm disa orë pasi Kievi kritikoi thirrjen e Musk për një zgjidhje të negociuar të konfliktit katastrofik 7-mujor të Rusisë me Ukrainën.
Zëdhënësi i Kremlinit Dmitry Peskov u tha gjithashtu gazetarëve në një konferencë përmes telefonit se Moska ka qenë gjithmonë e hapur për një negociim mbi fundin e konfliktit.
Kujtojmë se Musk renditi një sërë sugjerimesh që, sipas tij, mund të çojnë në paqe në Ukrainë.
Ai propozoi se referendumet e mbajtura muajin e kaluar në Ukrainën lindore të pushtuar nga Rusia duhet të ribëhen nën mbikëqyrjen e OKB-së, që furnizimi me ujë në Krime duhet të ‘sigurohet’ dhe se ‘Ukraina të mbetet neutrale’.
Ai tha gjithashtu se marrëveshja e paqes duhet të përfshijë një njohje të Krimesë, e cila u aneksua ilegalisht nga Rusia në 2014, duke e bërë atë formalisht pjesë të Federatës ruse.
Është e qartë se ky propozim nuk solli reagime pozitive përkundrejt Musk.
Pas sondazhit të Musk, presidenti i Ukrainës, Volodymyr Zelensky iu kundërpërgjigj serisë së postimeve, duke krijuar sondazhin e tij ku pyeste: ‘Cili Elon Musk ju pëlqen më shumë? Ai që mbështet Ukrainën ose ai që mbështet Rusinë.’
Ashtu si me sondazhin e Musk, më shumë se 2 milionë njerëz u përgjigjën, me shumicën dërrmuese (pothuajse 80%) që votuan për ‘një që mbështet Ukrainën’.
