Aksioni policor i koduar “Porositësit” goditi një grup që vepronte me pagesë i përfshirë në ngjarje të rënda kriminale.
Sipas hetimeve, figura qendrore ishin vëllezërit Indrit dhe Gentian Beqiraj, të cilët, nga hetimet e deritanishme, dalin të implikuar në dy vrasje dhe një tentativë vrasje.
Vrasja e 4 Janarit të këtij viti në “Bon Bosko” në kryeqytet si dhe ekzekutimi në Maj i Arben Mërkurit janë urdhëruar nga Kasandër Noga, i arrestuar në Belgjikë.
Sipas hetimeve, dy vëllezërit janë kontaktuar edhe për një tjetër atentat, ku planifikohej të përdorej lëndë eksplozive, por që ka dështuar.
“Gjithashtu, dy vëllezërit janë kontaktuar dhe porositur edhe nga shtetasi F.B., që kundrejt pagesës të kryenin vrasjen e shtetasve S.Z. dhe I.H. Për këtë veprimtari kriminale, vëllezërit kanë marrë një shumë paraprake prej 3500 eurosh dhe kanë siguruar mjetet për realizimin e kësaj ngjarjeje dhe konkretisht 4 kg eksploziv, si dhe një armë zjarri automatik, të cilat janë gjetur dhe sekuestruar gjatë kontrolleve të ushtruara nga shërbimet e Policisë, gjatë datës 3 tetor 2022”, tha në një konferencë për mediat këtë të Martë drejtori i Policisë së Durrësit, Skënder Hita.
Mësohet se personi me iniciale F.B. që kryepolici i Durrësit i referohet si porositës është Flamur Bejko.
Ky i fundit është një nga 15 personat e arrestuar si pjesë e grupit.
52-vjeçari banues në Durrës është punonjës i Policisë së Burgjeve në qytetin bregdetar. Ai akuzohet për veprat penale “Mbajtja pa leje dhe prodhimi i armëve, armëve shpërthyese dhe i municioneve” dhe “Sigurimi i kushteve dhe mjeteve materiale për kryerjen e vrasjes”, kryer në formën e grupit të strukturuar kriminal.
Nuk dihet ende nëse Flamur Bejko ka marrë urdhër nga dikush tjetër për këtë atentat.
Sipas hetimeve, Flamur Bejko bashkë me personat e tjerë të arrestuar janë të përfshirë në aktivitetin kriminal të dy vëllezërve.
“Të arrestuarit, në bashkëpunim me njëri-tjetrin, kanë vepruar në formën e një grupi të strukturuar kriminal, nga viti 2021 dhe në vazhdim”, tha kreu i Policisë së Durrësit, ndërsa një rol kryesor duket se e kishin dy vëllezërit.
Policia njoftoi se në cilësinë e provës materiale u sekuestruan: 1 kallashnikov, municion luftarak, 4 kilogramë eksploziv, fitil zjarrpërcjellës, detonator elektrik për shpërthime në distancë, 4 automjete, nga të cilat 2 blinduara, 2 motoçikleta, lëndë narkotike kokainë, 17 aparate celulare, 3050 euro, 2 armë gjahu shotgan, 1 thikë, sprajt neutralizues, 4 pistoleta sportive dhe 1 palë targa.
