Aksioni policor i koduar “Porositësit” ka zbuluar një prej bashkëpunëtorëve të ngushtë të Kasandër Nogës, një emër i njohur në botën e krimit në Shqipëri dhe jo vetëm.
Hetimet zbuluan se Kasandër Noga kishte dhënë porosi për dy vrasje, atë të 4 Janarit të këtij viti në “Bon Bosko” në kryeqytet ku u ngatërrua objektivi,si dhe ekzekutimin në Maj të Arben Mërkurit.
Për të dyja këto krime kanë dhënë detaje në dëshminë e tyre vëllezërit Indrit dhe Gentian Beqiraj.
Ishte pikërisht Kevin Zeneli alias Kevin Suçi, 23 vjeç nga Durrësi, që ka kontaktuar dy vëllezërit për të kryer këto krime. Dhe porositë, sipas hetuesve, urdhri është dhënë nga Kasandër Noga.
Vetë Kevin Zeneli u shpall në kërkim në kuadër të operacionit “Porositësit”, ndërsa policia shpjegoi se ai rezultonte më herët në kërkim ndërkombëtar për një tentativë vrasjeje në Belgjikë. Bëhet fjalë pikërisht për atentatin e ndodhur ndaj Erion Hasanbellit, i cili u plagos në Bruksel me breshëri plumbash.
Mesa duket, Kevin Zeneli është përdorur edhe në këtë ngjarje nga Kasandër Noga, i cili me Erion Hasanbellin ka një histori të vjetër hakmarrje, e shënjuar me vrasje dhe plagosje, në Shqipëri dhe jashtë vendit. E fundit ishte atentati i Brukselit në Qershor të këtij viti.
E teksa krahu i armatosur i Nogës mbetet në kërkim, ky i fundit, siç shpjegoi policia këtë të Martë, është i arrestuar në Belgikë.
Disa ditë pas atentatit të Brukselit, një media austriake raportoi arrestimin e tij lidhur me këtë ngjarje, në tentativë për tu arratisur drejt Shqipërisë.
Pas arrestimit të Vjenë, duket se Noga është ekstraduar në Belgjikë, që e shpallur në kërkim për plagosjen e Erion Hasanbellit në Bruksel.
