Blerja e një shtëpie në Tiranë, duket të jetë një mision i pamundur, kryesisht për çiftet e reja të cvilët nuk kanë zgjedhur opsionin e fundit si bashkëmoshatarët e tyre për të emigruar, por kanë zgjedhur të ndërtojnë familje në kryeqytet duke punuar me dinjitet dhe ndershmëri.
Teksa një studim i tregut të pasurive të paluajtshme gjatë vitit të kaluar arrinte ne konkluzionin se shqiptarëve iu duhen mbi 30 vite jetë dhe punë, pa shpenzuar asnjë qindarkë prej pagës për të blerë një apartament, duket se shifrat kanë “fluturuar” pas shpërthimit të luftës në Ukrainë dhe thellimit të inflacionit.
Në 7 vitet e fundit çmimi i një apartamenti në Tiranë kushton më tepër se në 2015, shifrat e Bankës së Shqipërisë tregojnë se çmimet e shtëpive kanë kapur “majat” duke u rritur me të paktën 40% vetëm në periudhën 2021-2022.
Në 6 muajt e parë të këtij viti indeksi i çmimeve regjistroi një rritje me rreth 40% dhe ekspertët imobiliarë e argumentojnë këtë fakt me rritjen e çmimit të materialeve të ndërtimit, karburantet por edhe taksat.
Periferia e Tiranës duket se mbetet më e favorshmja për sa i përket çmimeve të cilat variojnë nga 600 deri në 700 euro për metër katror, ndërsa qendra e kryeqytetitm aty ku kullat kanë mbirë si kërpudhat me bekimin e kryebashkiakut Erion Veliaj, 1 metër katrorë kushton sa “qimet e kokës.
Me Tiranën që parakalon metropole dhe qytete si Milano, Roma, Athina e Madridi, çmimi i apartamenteve është i frikshëm kur krahasimi bëhet me xhepin “e shpuar” të shqiptarëve prej shtrenjtimit të çmimeve të shportës, faturave të larta të energjisë dhe çmimit të karburantit që rritet jo proporcionalisht me ritmin e bursës ndërkombëtare.
Ndërkohë, rritje kanë pësuar edhe çmimet e qirasë dhe kjo sipas agjentëve që kanë folur për ABC Neës, pasi kërkesa e përgjithshme për marrje me qira raportohet më e lartë nga kërkesa gjatë gjashtëmujorit të kaluar.
ÇMIMET SIPAS ZONAVE PËR M²:
FRESKU 650-700 EURO
YZBERISHT 700-750 EURO
BRENDA UNAZËS 1300 EURO
QENDËR 4000-4500 EURO
