Komisioni Europian ka paditur në gjykatë Maltën për skemën e saj të shitjes së pasaportave, edhe pse vendi ishullor e ka shfuqizuar ligjin që në vitin 2020.
Por, Komisioni thotë se skema po vijon të zbatohet për aplikimet e bëra para shfuqizimit të ligjit. Sipas Brukselit, pasaportat po blihen në një numër të madh nga persona të korruptuar, të lidhur me krimin e organizuar, trafikun e drogës dhe të akuzuar për shkelje të të drejtave të njeriut.
Përveç Maltës, Komisioni i ka kërkuar edhe Qipros që të heqë dorë nga skema. Të dyja vendet kanë shitur pasaporta për disa vite në një vlerë që përllogaritet në rreth 10 miliardë dollarë nga 2010 deri në 2020, raporton “Euronews”.
Shitjen e pasaportave po mendon edhe Shqipëria. Në një vendim të miratuar në fund të muajit korrik, qeveria i hap rrugë bashkëpunimit me PPP me kompani private.
Nga ana tjetër Komisionit Europian shprehet kundër dhe paralajmëron pasoja negative në rrugën e integrimit.
“Rreziqet përfshijnë infiltrimin e krimit të organizuar, pastrimin e parave, evazionin fiskal dhe korrupsionin nëpërmjet aplikantëve të mundshëm nga vendet e treta”, u shpreh zëdhënësja e Komisionit Evropian, Ana Pisonero-Hernandez, në një intervistë për DW lidhur me nismën.
Ekspertë dhe opozita po ashtu kanë ngritur shqetësim për nismën qeveritare.
