Nga Boldnews.al
Gjykata e Apelit të Tiranës ka rikonfirmuar masën “arrest në shtëpi” për shtetasin kinezo-kamboxhian, Liangbin Chen, pasi prokurorja e Apelit, Arta Marku, ka vendosur të refuzojë ankimin e kolegëve të saj të Prokurorisë Tiranë, që kërkonin “arrest me burg” për personin e akuzuar për mashtrim me vlerë 140 milionë euro.
Prokurorja Marku ka deklaruar në seancën e kësaj të Enjteje se qëndrimi në qeli i kinezit Chen i rrezikon atij jetën, për shkak të gjendjes shëndetësore. Liangbin Chen u arrestua në Rinas, sapo kishte zbritur nga një udhëtim prej Dubait. Chen dyshohet se është koka e një grupi që me seli në qytetin Huzhoi në Kinë, ndërsa mashtrimet i ka kryer në të gjithë botën.
Përmes platformave online ku jepeshin shtëpi, kompjutera dhe telefona, ai ia ka dalë të kryejë një mashtrim me vlerë 1 miliardë yen kinezë. 32-vjeçari, me profesion programues kompjuterik, u arrestua si kreu i një grupi kriminal që ishte shpallur në kërkim ndërkombëtar për akuzën e “Mashtrimit” me pasoja të rënda. Ky grup kriminal ka mashtruar dhjetëra qytetarë kinezë, ndërkohë aktiviteti ka qenë i shtrirë edhe në Dubai. Pas arrestimit nga policia shqiptare, fillimisht ndaj tij u caktua masa e “arrestit me burg”.
Pak javë më pas, Chen kërkoi zbutjen masës së sigurimit, për shkak se pretendonte që kishte sëmundje në kokë, e cila do të përkeqësohej në kushte paraburgimi. Kërkesa e tij u pranua nga gjyqtari i Tiranës, Kujtim Vranici. Gjyqtari vendosi masën e “arrestit në shtëpi” me mbikqyrje policore në 9 shtator.
Vendimi shkaktoi reagimin e menjëhershëm të Prokurorisë së Tiranës, e cila ankimoi vendimin, duke kërkuar rikthimin në burg të shtetasit kinez.Po ashtu, edhe vetë Liangbin Chen kërkoi nga Gjykata e Apelit zbutjen e mëtejshme të masës, mundësisht atë të “ndalimit për dalje jashtë shtetit”.
Gjykata e Apelit zhvilloi paraditen e kësaj të Enjteje seancën. Që në fillim të saj, prokurorja e Apelit, Arta Marku, deklaroi se heq dorë nga ankimi. Marku deklaroi se personi nën hetim nuk duhet të qëndrojë në kushtet e paraburgimit, për shkak të kushteve shëndetësore.
Në këto kushte, gjykata e Apelit u detyrua të shqyrtojë vetëm kërkesën për zbutje mase, të dorëzuar nga i akuzuari për mashtrim miliardash.Në përfundim, siç njoftoi zyrtarisht Gjykata e Apelit, u la në fuqi masa e “arrestit në shtëpi” të vendosur nga shkalla e parë, për shkak se prokurori i çështjes (Arta Marku), hoqi dorë nga ankimi.
