Detaje të reja janë zbardhur nga mediat greke nga operacioni në Universitetin Politeknik të Athinës “Zografou”, ku në pranga përveç 32 eksponentëve të krimit ra edhe 30-vjeçari shqiptar, Esmin Ferhati.
Në tentativën për t’i shpëtuar operacionit, ku forcat e ELAS kthyen përmbys konviktet në godinën studentore pas dyshimeve se aty fshiheshin elementë kriminalë të përfshirë në grabitje të dhunshme dhe shpërndarjen e drogës, Ferhati plagosi me kaçavidë një police 35-vjeçare.
Në momentin që iu vërsul, efektivja greke ishte duke hyrë në makinën e saj private dhe iu kundërpërgjigj 30-vjeçarit shqiptar, i cili njihej në Athinë me nofkën “Esko” duke e plagosur në këmbë me armën e shërbimit.
Ndërkohë, “Protothema” raporton se Ferhati jetonte prej katër vitesh në konviktet e Universitetit Politeknik “Zografou” dhe së bashku me grupin e tij shqiptar, të përbërë nga 10 anëtarë dhe një police praktikante greke vetëm 22 vjeçe, i kishe kthyer 3 katet e kampusit të vjetër në një bazë krimi.
Ndërkohë heshtjen për ngjarjen e ka thyer në polici, efektivja greke duke rrëfyer se fillimisht ishte ndjerë keq dhe kishte dalë në oborrin e Universitetit Politeknik.
30-vjeçari Ferhati pasi e kishte parë, e kishte pyetur nëse ajo që kishte veshur ishte antiplumb dhe ajo nuk e kishte kuptuar qartë se çfarë i tha më pas.
Në këtë moment, i shtyrë edhe nga urrejtja për policinë, pasi i kishin arrestuar familjarët, shokët dhe bashkëshorten me fëmijën 1 vjeç, “Esko” i është vërsulur asaj.
Vajza police bëri një lëvizje për të shmangur kaçavidën dhe u plagos lehtë në dorë, ndërsa reagoi më pas duke qëlluar me armë mbi 30-vjeçarin.
“Gjithçka ndodhi shumë shpejt. Unë bëra gjënë e duhur për jetën time dhe të kolegut tim. Isha në punë që një ditë më parë dhe ngaqë lodhja ishte shumë thashë të largohesha për dy orë dhe të kthehesha, por ndodhi. Teksa po largohesha, pasi kishte marrë leje nga menaxheri im, ai e kuptoi që isha oficer policie dhe më sulmoi. E dija që ky ishte truri i organizatës. E vetmja gjë që më interesonte në atë kohë ishte të shihja zonën përreth meje të zbrazët nga njerëz, sepse është rezidencë studentore. Pasi u sigurova për sigurinë e të gjithë neve dhe të studentëve, veprova ashtu siç duhej. Ai kishte vetëm këtë kaçavidë, por zakonisht lëvizte me forca të blinduara. Ai erdhi drejt meje me qëllim që të më sulmonte. Është e qartë se nëse do të kishte një armë me vete, do ta kishte përdorur. Ai nuk erdhi vetëm për të më kërcënuar apo lënduar. Po të mos e kisha ngritur dorën do të më kishte goditur në qafë, në arterien karotide”, tha policja për televizionin Alpha.
