Esmin Ferhati, 30-vjeçari shqiptar që ra në pranga së bashku me 32 eksponentëve të krimit që i kishin shndërruar tre kate të konvikteve të vjetra të Univeristetit Politeknik të Athinës në bazë të krimit, duket të ketë një doje voluminoze, të mbushur me grabitje dhe rrëmbime.
I njohur në kryeqytetin helene me nofkën “Esko”, ai jetonte prej katër vitesh në konviktet e universitetit dhe së bashku me grupin e tij shqiptar, të përbërë nga djem dhe vajza, bënin jetë luksi, falë grabitjeve të shumta që kryenin.
Banda e shqiptarëve që qarkullonte me një “Mercedes”, paguante 100 euro në muaj për çdo dhomë mirëpo nuk paguanin energji dhe ujë, ndërsa në rrjetet sociale ekspozoheshin duke treguar sesi shijonin jetën e luksit me para të fituara nga grabitjet dhe shitja e drogës.
Por, “Esko” akuzohet për rrëmbimin e një fëmije të mitur dhe djalin e gazetarit të njohur grek Makis Papadatos në 11 maj të vitit 2019.
Ferhati akuzohet se e ka marrë peng djalin 17-vjeçar nga zona e “Zografou” teksa po kthehej në shtëpinë e tij në Pagrati. Ata e kanë goditur adoleshentin dhe pasi i kanë vënë një kapuç duke e “verbuar”, e kanë hedhur në makinë dhe e kanë çuar në kampus.
Aty djali u mbajt peng për shumë orë në duart e grabitësve shqiptarë, të cilët i morën edhe çelësat e shtëpisë.
Teksa 30-vjeçari mbante të fshehur adoleshentin, grupi i tij shkoi në shtëpinë e të atit të gazetar, që ndodhet në Pagrati dhe realizuan një grabitje të dhunshme.
Në momentin e sulmit ishin të pranishëm prindërit dhe vëllai i vogël i 17-vjeçarit. Papadatos në përpjekje për të mbrojtur familjen e tij është përleshur me ta, duke u plagosur lehtë nga banditët me thikë.
Tetë muaj më vonë, autoritetet arritën të vënë në pranga një nga autorët, ndërsa pjesa tjetër mbeti e zhdukur, me vlerësimin e policisë se ata kishin gjetur strehim në vendlindje. Në fund duket se “Esko” nuk ishte arratisur Shqipëri, por kishte gjetur strehë në godinën e vjetër të Universitetit Politeknik dhe këtë fakt e kishte denoncuar në organet e drejtësisë edhe vetë gazetari, por kishte rënë në vesh të shurdhër.
Edhe pse në kërkim për 5 çështje penale, 30-vjeeçari nuk ishte arrestuar asnjëherë dhe s’kishte kaluar asnjë ditë në burg, ndërsa jetonte i qetë me partneren e tij dhe fëmijën e tyre të porsalindur, vëllain “Erko” dhe të paktën 10 kriminelë të tjerë shqiptarë e grekë.
