Xhepat e qytetarëve shqiptarë janë rënduar mjaftueshëm nga inflacioni në rritje dhe do të vijojnë të “shpohen”, me vendimin më të fundit të qeverisë që hyn në fuqi më 1 tetor për caktimin e fashës së përdorimit të energjisë 800 kWh.
Sipas raporteve dhe kalkulimeve të faturave të energjisë, mbi 70 mijë familje do të detyrohen të paguajnë energjinë sa “frëngu-pulën” teksa propozimi për fashën u pranua pa asnjë kundërshtim nga ERE.
Por pavarësisht peshës që do të ketë në buxhetin e familjeve shqiptare, qeveria duket e pashqetësuar dhe zv/ministri i Infrastrukturës dhe Energjisë, Ilir Bejtja ka gjetur rastin t’i drejtohet me mesazhe ironike për t’i testuar durimin shqiptarëve.
Pas zv/kryeministres Belinda Balluku që nxori planin e “mbijetesës”, i cili parashikonte larjen e rrobave dhe të enëve të kuzhinës dy herë në javë, por edhe thirrja që dushi të bëhet nga dy persona njëkohësisht, ishte radha e Bejtjes për show-n e radhës.
“800 kWh në muaj janë të mjaftueshme edhe për t’u ngrohur gjatë dimrit”, deklaroi zv/ministri fillimisht.
Teksa surprizoi jo pak kur tha se nëse deri në janar do të kemi një dimër të thatë si ai i 2021 sa i përket reshjeve mund të kemi rritje të mëtejshme të tarifës se energjisë elektrikem Bejtja provokoi hapur shqiptarët kur shtroi pyetjen: “Si ja dilnit kur fasha ishte 300 kWh?”.
“42-lekëshi të jetë më i lartë, nëse do të jetë vit i thatë. Prandaj u themi konsumatorëve që të kursejnë. Si ia bënë kur fasha ishte 300 këh në muaj? Ne sot 258 këh i japim vetëm për ngrohje ftohje. Mundësi për të kursyer ekziston në çdo familje shqiptare…Nuk kemi vënë re ndonjë organizim që të bëje thirrje të kurset energjia. Askush si tejkalon 800 kWh, ato para që ne prishim për energjinë nuk mbesin në Shqipëri, shkojnë jashtë”, tha Bejtja per ABCNews.
