Ministria e Arsimit u kthye ditën e djeshme në arenën ku u njoftua përplasja e parë që qeveria do të ketë me shtresën e mesme, me pedagogët që lajmëruan mbajtjen e një proteste më 5 tetor, pasi nuk u arrit dakordësia për kërkesën e tyre për rritjen e pagave.
E teksa pedagogët kanë njoftuar datën e tubimit, është kërcënuar gjithashtu me bojkot të nisjes së vitit të ri akademik, që është parashikuar të startojë më 17 tetor.
Thirrjes së këtij grupi të shoqërisë duket se i bashkohet edhe Partia Demokratike, me kryetarin Sali Berisha që në komunikimin virtual me qytetarët kërkoi sot mbështetje masive për kauzën.
Berisha u bëri thirrje mësuesve, studentëve dhe gjimnazistëve që më 5 tetor të dalin në mbështetje të protestës se pedagogëve, pasi kërkesat e tyre janë të drejta dhe jetike për të shpëtuar rrokullisjen e madhe të sistemit arsimor.
“PD do i mbështesë protestat dhe u bën thirrje mësuesve që të bashkohen me protestën e tyre dhe të përgatiten për një grevë të përgjithshme që do trondisë nga themelet regjimin monist. U bëj thirrje edhe studentëve dhe gjimnazistëve që të mbështesin protestën e 5 tetorit si protestë e të gjithë sistemit arsimor”, konfirmoi Berisha.
