Spitali i Traumës në Tiranë ka reaguar pas arrestimit të mjekut anestezist ditën e sotme gjatë një aksioni policor për goditjen e korrupsionit.
Në një reagim për media, Spitali i Traumës kërkon zbardhjen e plotë të ngjarjes, ndërsa shprehet se raste të tilla nuk duhet të përdoren për njollosjen e bluzave të bardha. Mjeku Fitim Marku u arrestua pasi një polic i infiltruar si pacient i ofroi atij ryshfet, ndërsa mjeku raportohet se e pranoi. Flitet se për mjekun Marku ka patur denoncime të shumta nga pacientë të cilëve u kërkonte ryshfet.
Reagimi i Spitalit të Traumës:
“Nisur nga ngjarja e sotme e ndalimit të mjekut me inicialet F.M, Spitali Universitar i Traumës inkurajon organet e drejtësisë për të çuar deri në fund hetimin dhe zbardhjen e së vërtetës, për të vënë para përgjegjësisë këdo që përfshihet në veprime të kundërligjshme, përkundrejt shërbimit që ofrohet për qytetarët.
Raste të tilla nuk duhet të përkthehen në njollosjen e të gjitha bluzave të bardha, mjekëve dhe infermierëve, të cilët e kryejnë me përkushtim dhe korrektesë punën e tyre çdo ditë në shërbim të pacientëve.
Garantojmë qytetarët se, në Spitalin Universitar të Traumës nuk u ndërpre dhe nuk do të ndërpritet në asnjë moment shërbimi për këdo që ka nevojë për kujdes mjekësor”
