Nga Boldnews.al
Klaudio Malaj, krahas punës si shofer i kreut të Inspektoratit Ndërtimor të Bashkisë së Tiranës, Mariglen Qato, kryente edhe veprimtarinë kriminale të shpërndarjes së kokainës me sasi të mëdha, ndërkohë që zyrtarisht rezultonte i punësuar me pagë 60 mijë lekë si hidraulik në Ujësjellësin e kryeqytetit.
“Boldnews.al” ka mësuar detaje të reja nga arrestimi i 31-vjeçarit, i prangosur në kuadër të operacionit “Doses”, pasi iu gjetën doza të shumta kokaine, tre pistoleta pa leje, si edhe një sasi e konsiderueshme municioni.
Malaj u arrestua nga Policia e Tiranës në mesnatën e 18 Shtatorit, pasi në mjetin e tij luksoz, Audi A6, iu gjetën një sasi kokaine, e ndarë në disa doza.
Ai është pyetur fillimisht nga policia nëse kishte sende të paligjshme në makinë. Shoferi i kreut të Urbanistikës së Tiranës, ka deklaruar se kishte vetëm një dozë kokaine për përdorim vetjak.
Por, policia ka kryer kontrollin e mjetit dhe ka gjetur në total 34 doza kokainë, të gatshme për t’u shitur.
Pas arrestimit në flagrancë, policia ka kryer kontroll në banesën e Klaudio Malaj dhe aty ka gjetur një “arsenal” armësh.
Në dhomën e gjumit të tij, policia gjeti një pistoletë “Zastava”, një pistoletë gjysë-automatike e tipit “CZ-100”, si edhe një tjetër të vogël me mulli.
Krahas armëve, policia sekuestroi edhe rreth 80 fishekë pistolete, në kuti me mbishkrimin “Magnum”.
Më tej, gjatë kontrollit, Policia sekuestroi edhe një qese me kokainë në formë të ngurtësuar, si edhe një peshore për matjen e lëndës narkotike.
Në këto kushte, Policia ka kryer arrestimin në flagrancë të Klaudio Malaj, me funksion shofer i kreut të INUV-it Tiranë, Mariglen Qato, si i dyshuar për veprat penale të “mbajtjes pa leje të armëve luftarake” dhe “Prodhimi e shitja e lëndëve narkotike”.
Ai pritet të qëndrojë në burg deri në përfundim të hetimeve, pasi ndaj tij është vendosur masa e sigurisë “arrest në burg” nga gjykata e Tiranës.
