Vllaznia e femrave duhet të sakrifikojë edhe një ndeshje tjetër për të bërë atë që asnjë ekip tjetër shqiptar nuk ka arritur ta bëjë, kualifikimin në fazën e grupeve të UEFA Champions League.
Në ndeshjen e parë play-off të luajtur në Shkodër si udhëtuese ndaj Vorskla Kharkiv-2, ekipi kuqeblu nuk shkoi më shumë se barazimi 1-1 ku golin e të zakonshmes Megi Doçi e barazoi Osipian vetëm 12 minuta më vonë. Një sfidë shumë e luftuar që mund të ishte kthyer në favor të ukrainaseve në fund, të cilat patën edhe një rast të pastër për të kaluar në avantazh.
Vllaznia ka afruar shumë lojtare gjatë merkatos së verës pasi 6 nga 11 titullaret në fushë u afruan pikërisht për ndeshjet europiane pasi klubi shkodran që ka dominuar tërësisht futbollin e femrave në Shqipëri gjatë dekadës së fundit, kërkon të bëjë hapin e madh në Ligën e Kampioneve.
Vllaznia u eleminua në këtë fazë të Champions seyzonin e kaluar pasi u mund nga Juventusi por këtë sezon ka mundësinë e artë pasi të dyja ndeshjet do t’i luajë në Shkodër në pamundësi të skuadrës ukrainase për t’i zhvilluar ndeshjet në shtëpi, për shkak të luftës. Ndeshja e kthimit do të luhet në datën 28 shtator, ora 16:00.
