“Kurrë nuk kam dashur ta shes atë fanellë historike”. Deklarata e bërë ekskluzivisht për Daily Mail nga Lothar Matthaus, ish-futbollisti i Bayern, Inter dhe Gjermanisë, tani ambasador i Kupës së Botës në Katar.
Fanella në fjalë është ajo e Diego Maradona-s, të cilën të dy e shkëmbyen në finalen e Kampionatit Botëror të vitit 1986 në stadiumin Atzeca në Mexico City. Matthaus zbuloi se kishte dy mundësi për të shitur fanellën e ish-legjendës së Napoli-t me numrin 10: “Kishte një super ofertë prej gati tetë milionë eurosh, por në fund e refuzova”.
Ajo finale përfundoi me fitoren 3-2 të Argjentinës ndaj Gjermanisë Perëndimore. Ka qenë Kupat e Botës në të cilën Maradona ka lënë më shumë përshtypje, me dy gola kundër Anglisë (njëri me dorë dhe tjetri i cilësuar si goli i shekullit).
Matthaus, 61 vjeç, u tundua gjithashtu të shiste fanellën e vënë në kornizë në shtëpi “për të mbrojtur të ardhmen financiare të katër fëmijëve të mi”. Por ai refuzoi. Muajin e kaluar, fanella me numër 10 iu kthye ambasadorit argjentinas në Madrid: “Nuk kam menduar kurrë: dua paratë për këtë fanellë. Ishte kënaqësi për mua t’ia ktheja popullit argjentinas”.
Matthaus ishte një mik i madh i Maradona-s dhe pranon: “Diego ishte lojtari më i madh i kohës sime. Asnjë njeri në botë nuk e bëri atë që bëri ai me një top futbolli. Diego është një zot në Argjentinë, kjo është arsyeja pse ka qenë speciale ta dhuroja fanellën”
