Orges Shehi e konsideron si shumë të rëndësishme ndeshjen me Teutën këtë të premte në orën 16:00. Sfida e javës së pestë do të luhet në stadiumin “Selman Stermasi” dhe trajneri durrsak do të sfidojë një njohje të vjetër, ish-kolegun Bledi Shkëmbi.
Përpara kësaj përballjeje, trajneri kampion flet për situatën në skuadrën e tij dhe të ardhmen e këtij grupi. Fillimisht ai konfirmon mungesën e Najdovskit për shkak të një dëmtimi ndërsa më pas vlerëson kundërshtarin, duke nënvizuar se Teuta i ka ende disa lojtarë të sezonit kur u shpall kampione dhe ka momentalisht një skuadër të rrezikshme nga e cila Tirana duhet të bëjë kujdes.
“Sigurisht që Teuta ka ndryshuar një javë para dhe ne aty do të fokusohemi. Mendoj se është një kundërshtar që para dy vitesh ka dalë kampionë dhe ka akoma lojtarë me petkun e kampionit. Është një ndeshje e vështirë, pritshmëritë e të dyja skuadrave që kërkonin më shumë pikë.
Sigurisht që mungesa e Taulant Seferit ndihet shumë në skuadrën tonë. Në ndryshim nga sezoni i kaluar, këtë vit skuadra është rindërtuar në momentet e fundit dhe na duhet më shumë kohë për të rindërtuar grupin. Unë do të punoj që ekipi të përshtatet sa më shpejt me skemën e re pasi na u desh të ndryshonim për shkak të largimeve.
Nga ky grup lojtarësh që kemi do të kërkojmë të marrim maksimumin pasi merkatoja është mbyllur dhe nuk mund të kërkojmë për një emër që ashtu si Seferi të na sigurojë vazhdimësi në sulm”.
