Një breshkë deti e llojit “Caretta caretta”, apo siç quhet ndryshe breshka detare kokëmadhe, është gjetur e ngordhur ditën e sotme në bregdetin e Gjirit të Lalzit.
Një prej problematikave të mëdha që i detyron ato të dalin në breg është ndotja e deteve, për shkak të bashkimit të ujërave të zeza të kanaleve me ujërat e detit, por edhe për shkak të përqëndrimit të lartë të leshterikëve.
Nuk duhet të harrojmë se breshkat e detit janë ndër krijesat më të rrezikuara të vendit tonë.
Grykëderdhja e lumit të Ishmit (Kepi i Rodonit, laguna e Patokut) ka përqendrimin më të madh të breshkave të detit në vend për shkak të derdhjes së ujrave me ndotje urbane të pasura në nutrientë që shtojnë fito dhe zooplanktonin, mikroorganizmat që filtrojnë dhe ushqehen me nutrientë dhe për pasojë shtohen gastropodet (crustace), dhe kandilat e detit që ushqehen me mikroorganizmat dhe më pas edhe breshkat e detit që ushqehen me kandile deti. Pra breshkat e detit mbajnë nën kontroll popullatat e kandileve të detit.
Breshkat e detit kanë 110 milionë vite që notojnë në oqeane dhe dete. Gjatë kësaj kohe, ato nuk kanë pësuar ndryshime. Janë aq të vjetra sa edhe dinosaurët, por ndryshe nga ata, breshkat jetojnë edhe sot. Kjo specie klasifikohet në rrezik zhdukjeje në rang global.
